Rusiya Baş Qərargah rəisi Valeri Gerasimovun Ukraynadakı rus qrupunun komandanlığından uzaqlaşdırılması ilə bağlı xəbərlər fonunda Müdafiə Nazirliyi generalın iştirakı ilə keçən müşavirədən videogörüntülər yayımlayıb.
Azpost.info xəbər verir ki, videoda Gerasimovun Hərbi Hava Qüvvələrinin Baş Qərargah rəisi Viktor Afzalovun məruzəsini dinlədiyi görülür.
İyulun 9-da baş tutan müşavirədə Afzalov Gerasimovu Ukraynanın dörd ballistik hədəfinin məhv edilməsi barədə məlumatlandırıb. Onun sözlərinə görə, Ukrayna zərbə raketlərinə çevrilmiş S-200 raketləri ilə Krım, Kaluqa və Rostov vilayətlərindəki hədəfləri vurmağa çalışıb.
“Vaqner”in qiyamından sonra saxlanıldığı bildirilən Aerokosmik Qüvvələrinin baş komandanı Sergey Surovikin bu müşavirədə də gözə dəyməyib. Gerasimovun müavini kimi Surovikin onunla birlikdə tribunada oturmalı idi.
“Gerasimov Baş Kəşfiyyat İdarəsinin rəisi və müştərək qrupun komanda məntəqəsinin məsul şəxsləri qarşısında S-200 raketləri və analoji zərbə silahlarının anbar və hazırlıq sahələrinin, həmçinin buraxılış mövqelərinin müəyyən edilməsi üzrə sistemli işin təşkili ilə bağlı tapşırıq qoyub”, – nazirliyin məlumatında deyilir.
Gerasimov həmçinin obyektlərin hava zərbələrindən mühafizəsini yaxşılaşdırmaq üçün əlavə tədbirlərin görülməsi barədə göstəriş verib.
İyulun 8-də “Rybar” Teleqram kanalı Baş Qərargah rəisinin Ukraynada komandanlıq və nəzarətdən uzaqlaşdırıldığı barədə yazıb. Kanalın məlumatına görə, qoşunlara faktiki rəhbərlik bir il əvvəl Hərbi Hava Qüvvələrinin komandanı vəzifəsini icra edən general-polkovnik Mixail Teplinskiyə keçib.
Bu məlumatı “Romanov Light” Teleqram kanalı təsdiqləyib. Z-kanallarına görə, Rusiya Silahlı Qüvvələrində genişmiqyaslı “təmizləmələr” üçün bəhanə “Vaqner”in qiyamı idi.
Rusiya prezidenti Vladimir Putin Gerasimovu 2023-cü ilin yanvarında Ukraynadakı rus qrupunun komandiri təyin edib. Ondan əvvəl bu vəzifəni Aerokosmik Qüvvələrin komandanı, general-polkovnik Sergey Surovikin tutub.
Əvvəllər Ukraynadakı rus qoşunlarına Gennadi Jidko və Oleksandr Dvornikov komandanlıq edirdi.
Müharibə Tədqiqat İnstitutunun (ISW) ekspertlərinə görə, ümumilikdə, 2022-ci ilin fevralından 2023-cü ilin may ayına qədər Putin ən azı 17 yüksək rütbəli qoşun komandirini dəyişib.
Azpost.info
