“Rusiya İrana “Su-35” qırıcılarının böyük partiyasını verməyib. Baxmayaraq ki, rəsmi Tehran bu təyyarələrin pulunu tam ödəyib və onları 2023-cü ildə almağı planlaşdırırdı”.
Azpost.info xəbər verir ki, bu barədə “Bourse & Bazaar” məlumatlı mənbələrə istinadən yazır.
Mənbələrin sözlərinə görə, Tehran Həsən Ruhaninin 2021-ci ildə başa çatan ikinci prezidentlik dövründə Moskvadan 50 qırıcı təyyarə sifariş edib. Sonra Rusiya müqaviləni 2023-cü ildə yerinə yetirəcəyinə söz verib. İndi isə İran rəsmiləri arasında heç bir mənbə Moskvanın sözünün üstündə duracağını gözləmir.
Moskvadan hərbi texnikanın alınması ilə bağlı problemlər İran Hərbi Hava Qüvvələrinin komandanı, briqada generalı Həmid Vahedinin açıqlamasından məlum olub.
“Su-35″ qırıcılarının Rusiyadan alınmasına ehtiyacımız var, lakin onların eskadronumuza nə vaxt daxil olacağını bilmirik”, – Vahedi dövlət televiziyasına müsahibəsində deyib.
Əsasən 1979-cu il inqilabından əvvəl xidmətdə olan ABŞ təyyarələrindən ibarət olan hava qüvvələri donanmasını yeniləmək üçün Tehrana yeni döyüş təyyarələri lazımdır.
İranın təhlükəsizlik rəsmisi Vahedinin tədarük məsələlərinə diqqət çəkməsindən məyus olduğunu bildirib. İran rəsmiləri Rusiyanın öhdəliklərini yerinə yetirməməsindən narazıdırlar, lakin onlar məsələni ictimai müzakirə üçün çox həssas hesab edirlər.
İddialara görə, “Su-35”lərin tədarükünü sürətləndirmək üçün ötən il İran Rusiyaya yüzlərlə PUA təhvil verməyə razılaşıb. Keçmiş diplomatın sözlərinə görə, PUA-ların ötürülməsi Qərb rəsmilərində müharibə şəraitində Moskva ilə Tehran arasında əməkdaşlığın dərinləşdiyi təəssüratını yaratdı və İranın siyasi təcridinə töhfə verdi.
İrana görə, “Su-35”in tədarükünün ləngiməsinin mümkün səbəblərindən biri İsrailin təsiridir. İyun ayında İsrail Baş naziri Benyamin Netanyahu Rusiya hakimiyyətinə Moskvanın Tehranla artan hərbi əməkdaşlığından son dərəcə narahat olduğunu bildirib. Öz növbəsində, İsrail indiyədək Ukraynaya hücum silah sistemləri, eləcə də “Dəmir Günbəz” müdafiə sistemi verməkdən imtina edib.
Azpost.info
