Azərbaycan Mərkəzi Bankının valyuta ehtiyatları ilin əvvəlindən etibarən 3,8 milyard dollar artaraq 15,3 milyard dollara yüksəlib.
Bu barədə Azərbaycan Mərkəzi Bankı məlumat yayıb.
Mərkəzi Bankın açıqlamasına görə, valyuta bazarında təklifin tələbdən çox olması ehtiyatların artmasına imkan verib. Buna tədiyə balansının cari əməliyyatlar hesabında yaranan profisit və maliyyə sektorunda dollarlaşmanın azalması da təsir göstərib.
AMB yalnız avqust ayında valyuta bazarına 1,5 milyard dollar həcmində alış məqsədli müdaxilə edib. Bunun nəticəsində ilin əvvəlindən bankın valyuta ehtiyatları 33 faiz, yaxud 3,8 milyard dollar artıb.
Mərkəzi Bank bildirir ki, valyuta bazarında aldığı vəsaitin gələcəkdə bazarda yaranacaq tələbdən asılı olaraq tam və ya qismən yenidən satışa çıxarılması mümkündür. Bu addım bazarda tarazlığın qorunmasına xidmət edə bilər.
AMB makroiqtisadi sabitliyin təmin olunması məqsədilə valyuta bazarında alış və ya satış əməliyyatlarında iştirakını davam etdirəcəyi halda, bununla bağlı ictimaiyyətə əlavə məlumat veriləcəyini açıqlayıb.
