Cəmi 30 gün əlavə şəkərdən imtina etmək orqanizmin fəaliyyətinə müsbət təsir göstərə bilər. Dietoloq Ekta Sinqvalın sözlərinə görə, bu təcrübə yalnız çəkiyə deyil, həm də enerji səviyyəsinə, dərinin vəziyyətinə və maddələr mübadiləsinə təsir göstərir.
Azpost.info xəbər verir ki, bu barədə Healthshots nəşri məlumat yayıb.
Mütəxəssisin sözlərinə görə, qidaya əlavə edilən şəkərin azaldılması rasiondakı “boş kalorilərin” miqdarını aşağı salır. Bu isə arıqlamağa kömək edə, həmçinin həddindən artıq qidalanma meylini azalda bilər.
Dietoloq bildirir ki, əlavə şəkərdən imtina qanda qlükoza səviyyəsinin daha sabit qalmasına da kömək edir. Bunun nəticəsində gün ərzində enerjidə kəskin eniş-yoxuşlar azalır, insulinə qarşı müqavimətin və 2-ci tip şəkərli diabetin inkişaf riski aşağı düşə bilər.
Bundan başqa, şirniyyatların azaldılması ağız boşluğunun sağlamlığına da müsbət təsir göstərir. Ekspert qeyd edir ki, bu, diş kariyesi və diş əti xəstəliklərinin yaranma ehtimalını azaldır.
Əlavə şəkərin azaldılması dərinin vəziyyətinə də müsbət təsir edə bilər. Araşdırmalar yüksək şəkər istehlakının sızanaqlar və digər iltihabi dəri problemləri ilə əlaqəli olduğunu göstərir. Buna görə də şəkərin məhdudlaşdırılması dərinin daha təmiz görünməsinə kömək edə bilər.
Dietoloqun sözlərinə görə, şəkərin azaldılması bağırsaqların fəaliyyətini yaxşılaşdıra, əhval-ruhiyyəyə və diqqətin cəmlənməsinə müsbət təsir göstərə bilər. Bunun əsas səbəbi qanda qlükoza səviyyəsinin daha sabit qalmasıdır.
Mütəxəssis xüsusilə vurğulayır ki, söhbət əlavə edilmiş şəkərdən imtinadan gedir, meyvələrdən yox. Manqo, ananas, çiyələk və digər meyvələr vitaminlər, lif və antioksidantlarla zəngin olduğuna görə sağlam qidalanmanın vacib hissəsi olaraq qalır.
Bununla yanaşı, dietoloq şəkərli qazlı içkilərin, konsentrat meyvə şirələrinin və tərkibində gizli əlavə şəkər olan məhsulların istehlakını məhdudlaşdırmağı tövsiyə edir. Bunun üçün məhsul alarkən etiketdəki tərkibi diqqətlə oxumaq məsləhət görülür.
