Almaniyanın İqtisadiyyat Nazirliyi “Şimal axını 2” qaz boru kəmərinin ölkə ərazisindən keçən hissəsini milliləşdirmək və maye qazın qəbulu üçün üzən terminala qoşmaq imkanlarını nəzərdən keçirir.
Bu barədə “Der Spiegel” qəzeti öz mənbələrinə istinadla məlumat yayıb.
Məlumata görə, Almaniya hökuməti kəmərin ölkə ərazisində qalan hissəsini ümumi xətdən ayıraraq maye qaz terminalına birləşdirmək niyyətindədir. Belə ki, “Şimal axını 2” qazı seqment boyunca Almaniyanın cənubuna nəql etmək imkanlarına malik olan paylayıcı şəbəkəyə qoşulub. Lakin bunu əlavə razılıq əsasında etmək olar. Həm də mülkiyyət hüququ ilə bağlı qeyri-müəyyənlik mövcuddur. Berlin, eyni zamanda, Rusiyanın cavab tədbirlərindən, xüsusən Almaniya şirkətlərinin Rusiyadakı əmlaklarının qarşılıqlı milliləşdirilməsindən ehtiyatlanır.
AFR-in İqtisadiyyat Nazirliyi hələlik məsələ ilə bağlı şərh verməyib, lakin maye qaz terminalına qoşulmaq üçün mövcud infrastrukturdan istifadənin mühüm amil olduğunu vurğulayıb.
Xatırladaq ki, əvvəlcə 2019-cu ilin sonuna qədər başa çatdırılması nəzərdə tutulan, lakin ABŞ-ın sanksiyaları səbəbindən ləngiyən “Şimal axını 2” qaz kəmərinin tikintisi 2021-ci il sentyabrın 10-da başa çatıb. Ümumi gücü ildə 55 milyard kubmetr olan iki xətdən ibarət qaz kəməri Baltik dənizi vasitəsilə Rusiyadan Almaniyayadək uzanır.
