“Mənim səsim” Seçki Monitorinq Koalisiyası Bütöv Azərbaycan Xalq Cəbhəsi Partiyasının sədri, prezidentliyə namizəd Qüdrət Həsənquliyevlə görüş keçirib.
Bu haqda Azpost.info-ya açıqlama verən Koalisiya üzvü Səadət Bənənyarlı bildirib ki, görüşün məqsədi Bütöv Azərbaycan Xalq Cəbhəsi Partiyasının 7 fevralda keçiriləcək seçkiyə hazırlıq mərhələsinin monitorinqi olub:“Artıq seçkinin təşviqat mərhələsindəyik. Namizədlərin televiziya çıxışları, seçicilərlər görüşləri başlayıb. “Mənim səsim” Seçki Monitorinq Koalisiyası seçkinin bütün mərhələləri ilə bağlı təhlillər aparır və biz proses başa çatandan sonra müşahidə etdiklərimizi seçki prosesinin təkmilləşdirilməsi üzrə elmi araşdırmaya çevirmək niyyətindəyik. Koalisiyanın tərkibi də bunlar nəzərə alınaraq formalaşdırılıb. Ölkənin tanınan sosioloqları, politoloqları prosesə cəlb edilib”.
Səadət Bənənyarlı bildirib ki, görüşdə BAXCP-nin rəhbər heyəti iştirak edib. Monitorinq Koalisiyasını isə onunla bərabər insan haqları müdafiəçisi Novella Cəfəroğlu və professor Əhməd Qəşəmoğlu təmsil edib. Görüşdə ərazi bütövlüyünün bərpasından sonra yaranan yeni geopolitik situasiyada seçki prosesinin dövlət ənənələrinin yaranmasında rolundan xüsusi olaraq danışılıb: “Hər kəsə aydındır ki, 7 fevral seçkisi buna qədər keçirilən seçkilərdən çox fərqlidir. Ölkə reallıqları, dövlət-vətəndaş münasibətlərindəki yaxınlaşma tam fərqli bir situasiya yaradıb. Azərbaycan yeni dünya düzənində öz mövqeyini qorumaq və yüksəltmək üçün bir sıra proseslərdən keçməlidir ki, bunlardan biri də seçkidir. Prezident İlham Əliyev son çıxışlarında prezident seçkisinin önə çəkilməsi səbəblərini açıqlayarkən bu haqda danışıb. Bizim apardığımız araşdırmalar onu göstərir ki, seçicilər – böyük mənada cəmiyyət Azərbaycanın geosiyasi proseslərdə həssas bir dönəmdən keçdiyinin fərqindədir və üzərlərinə düşəni etməyə hazırdır. Bu mənada 7 fevralda yüksək seçici fəallığı gözləniləndir. Partiyalar üçün də yeni format yaranır. Qüdrət Həsənquliyev bir neçə dəfə prezidentliyə namizəd olub. Amma biz onunla söhbətdə həm namizəd kimi özünün, həm də seçki komandasının yeni çağırışlar üzrə hərəkət etdiyini görə bildik. Bütün bunlar seçkinin yeni reallıqlarıdır. Düşünürəm ki, proses bütünlükdə Azərbaycan dövlət həyatı üçün ciddi bir irəliləyiş kimi tarixə keçəcək”.
“Mənim səsim” Seçki Monitorinq Koalisiyası yaxın günlərdə digər namizədlərlə də görüş planlaşdırır.
Azpost.info
