Birdən-birə başın gicəllənməsi, tarazlığın itməsi və ətrafdakı əşyaların fırlanırmış kimi görünməsi bir çox insanın qarşılaşdığı narahatedici hallardan biridir. Əksər insanlar bunu yorğunluqla əlaqələndirib əhəmiyyət verməsə də, həkimlər bunun ciddi sağlamlıq probleminin əlaməti ola biləcəyini bildirirlər.
AzPost xəbər verir ki, tibb üzrə fəlsəfə doktoru, həkim Yuri Qaborets bu barədə sosial şəbəkə hesabında danışıb.
Başgicəllənmənin əsas səbəbləri
Həkimin sözlərinə görə, ən geniş yayılmış səbəblərdən biri arterial təzyiqin qəfil dəyişməsi və ya aşağı olmasıdır. Bu zaman beyinə gedən oksigen azalır və nəticədə insan başgicəllənmə hiss edir.
Digər vacib səbəb orqanizmdə gizli çatışmazlıqlardır. Xüsusilə qanda şəkərin kəskin azalması və ya anemiya bu vəziyyətə səbəb ola bilər.
Mütəxəssis bildirir ki, daha mürəkkəb hallarda problem damar xəstəlikləri, boyun fəqərəsində sıxılmalar və ya daxili qulaqda yerləşən vestibulyar aparatın pozğunluğu ilə əlaqəli olur.
Həkimə nə vaxt müraciət edilməlidir?
Yuri Qaborets qeyd edir ki, əgər başgicəllənmə həftədə 2-3 dəfədən çox təkrarlanırsa, bu, ciddi müayinəyə ehtiyac olduğunu göstərir.
Belə hallarda insanın özbaşına müalicə ilə vaxt itirməsi təhlükəli hesab olunur.
Başgicəllənmə zamanı nə etmək lazımdır?
Mütəxəssislər başgicəllənmə hiss edilən anda qəfil hərəkətlər etməməyi tövsiyə edirlər. İnsan dərhal oturmalı və ya uzanmalıdır ki, yıxılma riski yaranmasın.
Həmçinin kiçik qurtumlarla su içmək və arterial təzyiqi ölçmək məsləhət görülür.
Təhlükəli əlamətlər
Həkim xəbərdarlıq edir ki, bəzi hallarda başgicəllənmə insultun ilkin əlaməti ola bilər. Əgər başgicəllənmə ilə yanaşı aşağıdakı simptomlar yaranarsa, dərhal təcili yardım çağırılmalıdır:
- qol və ya ayaqda qəfil zəiflik və keyimə;
- nitq pozuntusu;
- dözülməz və kəskin baş ağrısı;
- üzün bir tərəfində asimmetriya.
Mütəxəssislər bildirirlər ki, belə vəziyyətlərdə hər dəqiqə həyati əhəmiyyət daşıyır.
