Çoxları üçün nahar və ya şam yeməyindən sonra bir fincan çay içmək gündəlik vərdişdir. Lakin mütəxəssislər bildirirlər ki, bu adət bəzi hallarda orqanizmin qida maddələrini mənimsəməsinə mənfi təsir göstərə bilər.
Azpost.info xəbər verir ki, dietoloqların sözlərinə görə, xüsusilə qara çayın tərkibində olan tanin maddələri dəmirin bağırsaqlarda sorulmasını azalda bilir. Bu səbəbdən dəmir çatışmazlığı riski olan şəxslərə yeməkdən dərhal sonra çay içmək tövsiyə edilmir.
Böyük Britaniyanın qidalanma üzrə mütəxəssisləri qeyd edirlər ki, çayı yeməkdən ən azı 30-60 dəqiqə sonra qəbul etmək daha məqsədəuyğundur. Xüsusilə qadınlar, uşaqlar və hamilələr dəmir çatışmazlığına daha həssas olduqları üçün bu tövsiyəyə diqqət yetirməlidirlər.
Azərbaycanlı qastroenteroloq Rəşad Məmmədov bildirir ki, çayın zərərli olması barədə fikir düzgün deyil. Problem onun qəbul vaxtındadır. Gün ərzində kifayət qədər su içmək və çayı yeməkdən müəyyən müddət sonra qəbul etmək həm həzmi, həm də mineral maddələrin mənimsənilməsini yaxşılaşdırır.
Mütəxəssislər bildirirlər ki, yaşıl çayın da oxşar təsiri olsa da, bu təsir qara çayla müqayisədə nisbətən zəifdir. Dəmir preparatı qəbul edən şəxslərə isə dərmanı çay və ya qəhvə ilə deyil, adi su ilə içmək tövsiyə olunur.
