Berlində nasist lideri olmuş Adolf Hitlerin bunkerinin sökülməsi və çoxmənzilli binanın tikintisi ilə bağlı mübahisə yaranıb.
Azpost.info bildirir ki, Mitte rayonundakı gözə çarpmayan boş ərazinin altında Adolf Hitlerin bunkerlərindən biri yerləşir. Nasist rejimi dövründə bu, “Yeni Reyx”in kanslerliyinin bir hissəsi idi. Bina 1945-ci ildə sovet ordusu tərəfindən ələ keçirilib və 1949-cu ildə sökülüb.
İndi bunkerin sökülməsi və yerində 66 mənzil və ofis binası olan yeddi mərtəbəli binanın tikilməsi planlaşdırılır. Bu planlar kəskin ictimai tənqidlə üzləşib. Berliner Unterwelten (Berlin Yeraltı) tarix cəmiyyətinin sədri Dietmar Arnoldun sözlərinə görə, bu gün nasist hakimiyyət mərkəzinin son qalıqlarından birini sökmək təmiz ağılsızlıqdır.
Arnoldun sözlərinə görə, onun təşkilatı illərdir ki, bu cür tikililərin sökülmədən necə istifadə edilə biləcəyini nümayiş etdirir. O əlavə edib ki, Yeni Reyx Kanslerliyinin son elementinin dağıdılması “rüsvayçılıq” olardı. Abidələrin qorunması agentliyinə görə, bunkerin böyük tarixi və elmi əhəmiyyəti var.
Sosial Demokratları təmsil edən Berlinin tikinti məsələləri üzrə senatoru Kristian Gebler bunkerin qorunmasına qarşı çıxır. “Sonradan ziyarətgah yerinə çevrilə biləcək bunkeri qorumaq naminə yeni mənzillərin tikintisinə mane olmayacağıq” deyə – o vurğulayıb. Senator bununla sağçı populist “Almaniya üçün Alternativ” partiyasının (AfD) artan populyarlığına işarə edib.
Hitlerin intihar etdiyi digər bunkerin yerində hazırda dayanacaq yerləşir.
