Qiymət artımları fonunda ailə büdcəsini düzgün idarə etmək hər zamankından daha vacibdir. Maliyyə mütəxəssisləri bildirirlər ki, qənaət etmək yalnız az pul xərcləmək deyil, mövcud gəlirdən daha səmərəli istifadə etmək deməkdir. Kiçik görünən vərdişlər ilin sonunda minlərlə manatlıq fərq yarada bilər.
Azpost.info xəbər verir ki, beynəlxalq maliyyə araşdırmaları göstərir ki, ailələr impulsiv alış-verişi azaltmaq və gündəlik xərcləri planlaşdırmaqla illik büdcələrinin 10-20 faizinə qədər vəsaitə qənaət edə bilirlər.
Alış-verişə siyahı ilə gedin
İqtisadçılar hesab edir ki, mağazaya əvvəlcədən hazırlanmış siyahı ilə getmək lazımsız məhsulların alınmasını əhəmiyyətli dərəcədə azaldır. Marketinq araşdırmalarına görə, plansız alış-veriş edən insanlar orta hesabla 20-30 faiz daha çox pul xərcləyirlər.
Endirimə yox, ehtiyaca baxın
“Endirimdədir” sözü çox vaxt insanları ehtiyac duymadığı məhsulları almağa sövq edir. Maliyyə ekspertləri bildirirlər ki, endirim yalnız istifadə ediləcək məhsula tətbiq olunursa, qənaət hesab edilə bilər.
Elektrik enerjisinə qənaət edin
Enerji Agentliyinin tövsiyələrinə əsasən, LED lampalardan istifadə elektrik sərfiyyatını ənənəvi lampalarla müqayisədə 70-80 faiz azalda bilər. İstifadə olunmayan elektrik cihazlarını şəbəkədən ayırmaq da aylıq ödənişlərə təsir göstərir.
Qida israfını azaldın
BMT-nin Ərzaq və Kənd Təsərrüfatı Təşkilatının məlumatına görə, dünyada istehsal olunan qidanın təxminən üçdə biri israf edilir. Evdə həftəlik menyu hazırlamaq və məhsulları düzgün saxlamaq həm büdcəyə, həm də ətraf mühitə müsbət təsir göstərir.
Mütəxəssislər hesab edirlər ki, gündə cəmi 3-5 manat qənaət etmək ilin sonunda 1 000 manatdan çox vəsait toplamağa imkan yarada bilər. Əsas məsələ qənaəti birdəfəlik tədbir deyil, davamlı maliyyə vərdişinə çevirməkdir.
Sunay
