Yaponiyada müxtəlif sahələri əhatə edən 18 sektorda 10 milyondan çox robotdan istifadə ediləcək.
Dövlət televiziyası NHK-nın Yaponiyanın İqtisadiyyat, Ticarət və Sənaye Nazirliyinə istinadən verdiyi məlumata görə, hökumətin süni intellektlə işləyən robotlarla bağlı strategiyası açıqlanıb.
Ölkənin azalan işçi qüvvəsinin qarşısını almaq üçün 2040-cı ilə qədər 18 sektorda 10 milyon süni intellektlə işləyən robot yerləşdirmək planı var.
Robotların istifadəsinin gözlənilən 18 sektoruna istehsal, infrastrukturun saxlanılması, səhiyyə, xidmət, təbii fəlakətlərə cavab və müdafiə daxildir.
Təkcə kompüter ekranında deyil, real həyatda da fəaliyyət göstərə bilən süni intellekt növlərinin inkişaf etdirilməsi layihəsinə ümumilikdə 380 milyard yapon yeni (təxminən 2 milyard 400 milyon dollar) vəsait ayrılacaq.
Yaponiyanın iqtisadiyyat, ticarət və sənaye naziri Akazava Ryosei kabinet iclasından sonra jurnalistlərə bildirib ki, müəyyən sektorlarda məlumatlar toplanır və ölkəni robotlar üçün süni intellektin inkişafında lider mövqeyinə çıxarmaq üçün istifadə olunacaq.
