“İran ABŞ ilə imzalanmış memorandumu pozmayıb və onun yerinə yetirilməməsinə görə məsuliyyət Vaşinqtonun üzərindədir“.
Azpost.info TASS -a istinadən xəbər verir ki, bunu İran Xarici İşlər Nazirliyinin sözçüsü Esmail Baqayi brifinqdə bildirib.
O bildirib ki, Tehran həmişə ABŞ ilə danışıqlara məsuliyyətlə yanaşıb və əldə edilmiş razılaşmaların pozulmasına təşəbbüs göstərməyib. “İran heç vaxt öhdəliklərinin pozulmasına təşəbbüs göstərməyib. Bildiririk ki, İran bütün danışıqlarda dəqiqlik və ciddilik nümayiş etdirib. Razılaşmaları ardıcıl olaraq pozan tərəf Amerika tərəfidir”, – Baqayi deyib.
İran Xarici İşlər Nazirliyinin sözçüsü qeyd edib ki, Tehran qarşılıqlılıq prinsipinə riayət etmək niyyətindədir və ABŞ-ın hərəkətlərinə eyni şəkildə cavab verəcək: “Əvvəldən “öhdəlik müqabilində öhdəlik” prinsipi barədə danışmışıq. Əgər qarşı tərəf öz öhdəliklərinə əməl edərsə, biz də öz öhdəliklərimizə əməl edəcəyik. Bundan sonra biz bu şəkildə hərəkət edəcəyik: qarşı tərəf öz öhdəliklərini pozmağa davam etdiyi müddətcə, İran da öz növbəsində üzərinə götürdüyü öhdəlikləri yerinə yetirməkdən çəkinəcək”, – Baqayi bildirib.
İran Xarici İşlər Nazirliyinin sözçüsü regiondakı vəziyyəti şərh edərkən Tehranın Fars körfəzi ölkələrinə hücum etmədiyini və hərəkətlərinin yalnız Amerika hərbi obyektlərinə qarşı yönəldiyini vurğulayıb.
O əlavə etdi ki, İran dəfələrlə regional dövlətləri ABŞ-ın onların ərazisindən İslam Respublikasına qarşı əməliyyatlar üçün istifadə etməsinə icazə verməməyə çağırıb.
Bəqai həmçinin Hörmüz boğazının təhlükəsizliyi məsələsinə toxunaraq bildirib ki, İran bu strateji marşrutun milli təhlükəsizliyinə təhdid mənbəyinə çevrilməsinə icazə verməyəcək. Onun sözlərinə görə, ABŞ-ın ticarət gəmiləri üçün hərbi müşayiətlə bağlı açıqlamaları Vaşinqtonun regionda qeyri-sabitliyi qorumaq istəyini göstərir.
