Azərbaycan Respublikası Mədəniyyət Nazirliyinin tabeliyində fəaliyyət göstərən Kino Agentliyinin (ARKA) və C.Cabbarlı adına “Azərbaycanfilm” Kinostudiyasının dəstəyi ilə Azərbaycan Kinosu Günü münasibətilə açıq səma altında xüsusi kino axşamı təşkil olunub.
Tədbirin proqramı “Atəş Hub” yaradıcı platforması və “Yaradıcı Azərbaycan” layihəsinin rezidenti olan “Torpağın Səsi” komandası tərəfindən hazırlanıb.
Onlayn qeydiyyat əsasında “Azərbaycanfilm” Kinostudiyasına gələn 400-dən çox tamaşaçı kinostudiyada təşkil olunan ekskursiyada iştirak edib. Ziyarətçilər filmlərin çəkiliş prosesini canlı izləmək, müxtəlif pavilyonlar, çəkiliş otaqları, rekvizit anbarları, müxtəlif dövrlərə aid silah kolleksiyası, habelə filmlərdə istifadə olunan həkim otağı, yataqxana, kitabxana və digər dekorasiyalarla yaxından tanış olmaq imkanı əldə ediblər.
Tədbir çərçivəsində “Atəş Hub” yaradıcı platformasının rəssamı Bəxtiyar Zeydzadənin Azərbaycanın Əməkdar rəssamı Səbinə Şıxlinskayanın mentorluğu ilə “Azərbaycanfilm” Kinostudiyası üçün hazırladığı xüsusi divar rəsmi də təqdim olunub.
Ekskursiya zamanı iştirakçılar Mədəniyyət Nazirliyi, ARKA və “Azərbaycanfilm” Kinostudiyasının birgə istehsalı olan “Daşlara həkk olunan tale: Əcəmi Naxçivani” tammetrajlı bədii filminin çəkiliş prosesini də canlı izləyiblər.
Axşam proqramı açıq hava kinoteatrında nümayiş etdirilən Azərbaycanın sevilən filmləri ilə davam edib. Əvvəlcə “Bəyin oğurlanması” filmi nümayiş olunub, daha sonra tamaşaçılar üçün DJ performansı təqdim edilib.
Tədbirin sonunda isə “Gün keçdi” filminin əsas qəhrəmanlarından biri, Xalq artisti Leyla Şıxlinskaya tamaşaçılarla qısa görüş keçirib. Kino axşamı “Gün keçdi” filminin nümayişi ilə başa çatıb.
