Giriş: Ayaqqabı ilə evə daxil olmaq çoxumuz üçün adi vərdişdir. Lakin küçədə gün ərzində addımladığımız səthlərdə yalnız görünən kir və toz deyil, müxtəlif mikroorqanizmlər, kimyəvi maddələrin qalıqları və digər çirkləndiricilər də ola bilər. Buna görə evə daxil olarkən ayaqqabını çıxarmaq sadə gigiyena qaydası olmaqla yanaşı, yaşayış mühitinin təmizliyinə də təsir edə bilər.
Ayaqqabının altına nələr yapışır?
Küçədə asfalt, torpaq, ot, ictimai nəqliyyat dayanacaqları, mağazalar və digər məkanlardan keçərkən ayaqqabının altına müxtəlif maddələr yapışa bilər.
Bura torpaq hissəcikləri, heyvan tullantıları, yol çirkləndiriciləri və müxtəlif mikroorqanizmlər daxil ola bilər.
Ayaqqabı ilə evə daxil olduqda bütün bunların xalça, döşəmə və digər səthlərə yayılması mümkündür.
Xalça xüsusilə diqqət tələb edir
Xalça və yumşaq döşəmələr ayaqqabı altından gətirilən toz və çirkləndiriciləri daha uzun müddət saxlaya bilər.
Evdə kiçik uşaqlar varsa, məsələ daha əhəmiyyətlidir. Çünki uşaqlar tez-tez döşəmədə oynayır və əllərini ağızlarına aparırlar.
Ayaqqabını çıxarmaq kifayətdirmi?
Tam təmizlik üçün yalnız ayaqqabını çıxarmaq kifayət etmir. Evə daxil olan kimi əlləri yumaq, döşəməni mütəmadi təmizləmək və xüsusilə giriş hissəsində ayaqqabı üçün ayrıca zona yaratmaq faydalıdır.
Ayaqqabının altını mütəmadi təmizləmək də çirklənmənin azalmasına kömək edir.
Bəs bunun ekologiyaya nə aidiyyəti var?
Ayaqqabı ilə gətirilən çirk səbəbindən evdə daha tez-tez və daha çox təmizlik vasitəsindən istifadə etmək lazım gələ bilər.
Ayaqqabını qapıda çıxarmaq isə döşəmənin daha az çirklənməsinə, təmizlik üçün su və kimyəvi vasitələrə tələbatın azalmasına kömək edə bilər.
Yəni çox sadə bir vərdiş həm gigiyena, həm də məişətdə resurslardan daha səmərəli istifadə baxımından faydalıdır.
