Hindistan kinosunun ən məşhur simalarından biri olan Şahrux Xan Azərbaycanda da uzun illərdir böyük tamaşaçı sevgisi qazanıb. Onun filmləri, xüsusən romantik rolları bir neçə nəsil tamaşaçının yaddaşında qalıb.
Lakin Şahrux Xanın müsahibələrinə diqqət yetirəndə ekrandakı romantik qəhrəmandan fərqli, işə, uğura, ailəyə və həyatın özünə kifayət qədər realist yanaşan bir insan görünür.
Onun müxtəlif illərdə verdiyi müsahibələrdə söylədikləri əsasında Şahrux Xanın uğur fəlsəfəsini bir neçə əsas prinsipdə toplamaq mümkündür.
“Ulduz olmaq üçün xüsusi planım yox idi”
Şahrux Xan Bollivud ailəsindən gəlməyib. O, Dehlidən Mumbaya gələndə qarşısında hazır aktyor karyerası yox idi. 2013-cü ildə “The Guardian”a verdiyi müsahibədə bildirib ki, kino ulduzuna çevrilmək üçün xüsusi metodu olmayıb – sadəcə onu xoşbəxt edən işləri görüb.
Onun sözlərinə görə, əsas məqsədi əvvəlcə aktyor olmaq idi, ulduz olmaq yox.
Bu, onun karyerasının maraqlı paradokslarından biridir: Şahrux Xan ulduz olmağa çalışmadığını deyə-deyə dünyanın ən tanınmış aktyorlarından birinə çevrildi.
Uğur təsadüf deyil, uzunmüddətli zəhmətdir
Şahrux Xan müsahibələrində dəfələrlə uğurun arxasında zəhmətin dayandığını vurğulayıb.
O, şöhrətin kənardan göründüyündən daha çətin olduğunu etiraf edib. 2016-cı ildə “The Guardian”a müsahibəsində ulduz statusunu qorumaq üçün nə qədər çox işləməli olduğunu açıq şəkildə danışıb.
Onun yanaşması sadədir: uğur əldə etdikdən sonra da işləməyə davam etmək lazımdır.
“Mən adi insanam”
Şahrux Xanın müsahibələrində tez-tez təkrarlanan fikirlərdən biri onun özünü adi insan kimi görməsidir. 2011-ci ildə “Khaleej Times”a müsahibəsində özünü “tamamilə adi” biri kimi xarakterizə edib. O, məşhurluğun arxasında yenə də adi insanın olduğunu vurğulayıb.
Bəlkə də onun Hindistanda və başqa ölkələrdə bu qədər sevilməsinin səbəblərindən biri də budur. Ekranda milyonların qarşısına çıxan insan özünü tamaşaçıdan tamamilə fərqli göstərməyə çalışmır.
Ailə onun üçün şöhrətdən daha vacibdir
Şahrux Xan müsahibələrində uşaqları ilə münasibətlərindən də danışıb.
O, valideynlərin uşaqlarına vaxt ayırmasının xüsusi bir qəhrəmanlıq olmadığını bildirib. Öz valideynlərini erkən yaşda itirdiyini deyən aktyor bunun uşaqlıq həyatına təsir etdiyini vurğulayıb. Sonrakı müsahibələrində də övladlarını şöhrətin mənfi tərəflərindən qorumağa çalışdığını deyib. Oğlu Aryan, qızı Suhana və kiçik oğlu AbRamın hərəsinin öz yolunu seçməsinə imkan verməyə çalışdığını vurğulayıb.
Uğurunda qadınların rolunu xüsusi qeyd edir
Şahrux Xanın ən maraqlı fikirlərindən biri də uğurunda qadınların roluna verdiyi qiymətdir. 2016-cı ildə “The Guardian”a müsahibəsində aktyor filmlərdə birlikdə çalışdığı qadın həmkarlarının onun uğurunda böyük rol oynadığını deyib. O, Madhuri Dixterdən rəqs səhnələrini, Juhi Çavladan komediya, Kajoldan isə emosional səhnələr baxımından çox şey öyrəndiyini qeyd edib.
Bu, Şahrux Xanın uğur haqqında başqa bir yanaşmasını göstərir: uğur yalnız bir insanın şəxsi nailiyyəti deyil, ətrafındakı insanların da əməyinin nəticəsidir.
O, uğursuzluqdan qorxmadığını göstərir
Şahrux Xan uzun karyerası ərzində uğurlu filmlərlə yanaşı, gözlənilən nəticəni verməyən layihələr də yaşayıb.
Lakin onun müsahibələrindən görünür ki, uğursuzluğu karyeranın sonu kimi qəbul etmir. Əksinə, aktyor müxtəlif dövrlərdə yenidən dəyişməyi, yeni janrlara keçməyi və tamaşaçının qarşısına başqa obrazlarda çıxmağı bacarıb.
Bu xüsusiyyət onun 1990-cı illərin romantik qəhrəmanından 2020-ci illərin aksiyon filmlərindəki obrazlara qədər dəyişməsində də özünü göstərir. TIME-a verdiyi 2025-ci il müsahibəsində o, kino texnologiyalarının və tamaşaçı təcrübəsinin dəyişməli olduğunu bildirib.
“Filmlər daha böyük təcrübəyə çevrilməlidir”
Şahrux Xan artıq 30 ildən çoxdur ki, kino sənayesindədir. Buna baxmayaraq, o, kinonun dəyişməli olduğunu düşünür. 2025-ci ildə TIME-a danışan aktyor müasir tamaşaçının filmlərə baxmaq vərdişlərinin dəyişdiyini qeyd edib. Onun fikrincə, hekayələr dürüst qalmalı, lakin onların təqdimat forması daha maraqlı olmalıdır.
Bu yanaşma onun öz karyerasına da aiddir: keçmiş uğuru qorumaq kifayət deyil, tamaşaçının dəyişən zövqünü anlamaq lazımdır.
Şöhrətin arxasında insan qalmalıdır
Şahrux Xanın müsahibələrindən çıxan ən maraqlı nəticələrdən biri budur ki, o, özünün yaratdığı “Kral Xan” obrazı ilə real insan arasında fərq qoymağa çalışır. Bir müsahibəsində özünün “Şahrux Xan obrazının işçisi” olduğunu belə ifadə edib. Yəni tamaşaçının yaratdığı nəhəng ulduz imicinin də idarə olunmalı bir tərəfi olduğunu qəbul edir.
Bu, onun şöhrətə münasibətini yaxşı ifadə edir.
Bəs Şahrux Xan niyə bu qədər sevilir?
Bunun tək bir cavabı yoxdur.
O, 30 ildən artıq müddətdə romantik qəhrəman, faciəvi obraz, komediya aktyoru və aksiyon ulduzu kimi fərqli rollarda çıxış edib. Lakin ekran obrazlarından kənarda müsahibələri onun başqa bir xüsusiyyətini göstərir: özünü hələ də öyrənən, işləyən və dəyişən aktyor kimi görür.
Bəlkə də Şahrux Xanın Azərbaycanda da uzun illər sevilməsinin sirri məhz bundadır.
Çünki onun filmlərindəki sevgi, mübarizə, uğur və itki hissləri ölkə və sərhəd tanımır. Ekrandakı qəhrəman dəyişsə də, tamaşaçı onun hekayələrində özündən bir parça tapır.
Və Şahrux Xanın öz müsahibələrindən çıxan ən mühüm dərs belə səslənir: insan nə qədər məşhurlaşsa da, uğurun başlanğıcındakı sadə insanı itirməməlidir.
N.Talıblı
