Dünyanın 130-dan çox dövlət və hökumət başçısı bu həftə BMT Baş Assambleyasının yüksək səviyyəli toplantısında iştirak edəcək.
AP-nin məlumatına görə, toplantının gündəliyində İran, Qəzza, Ukrayna, Sudan, Konqo və Myanmada davam edən müharibələr, iqlim dəyişiklikləri, dünya iqtisadiyyatındakı problemlər və süni intellektin yaratdığı risklər əsas yer tutur.
BMT-də təşkilatın özünün gələcəyi də müzakirə olunacaq. 193 üzv dövlət Təhlükəsizlik Şurası da daxil olmaqla əsas qurumların islahatı ilə bağlı geniş planı razılaşdırıb.
ABŞ Prezidenti Donald Tramp və Fransa Prezidenti Emmanuel Makron çərşənbə axşamı Baş Assambleyada çıxış edəcəklər. Ukrayna Prezidenti Volodimir Zelenski və İran Prezidenti Məsud Pezeşkianın çıxışları isə çərşənbə gününə planlaşdırılıb.
Çin Prezidenti Si Tszinpin, Rusiya Prezidenti Vladimir Putin və Hindistanın Baş naziri Narendra Modi toplantıda iştirak etməyəcəklər.
BMT Təhlükəsizlik Şurasının bu həftə süni intellektə həsr olunmuş ayrıca yüksək səviyyəli toplantı keçirməsi də planlaşdırılır.
