Azərbaycanda 2026-cı ilin ilk 9 ayında qeydə alınan cinayətlərin sayı ötən ilin eyni dövrü ilə müqayisədə 5,7 faiz azalıb. Hesabat dövründə hüquq-mühafizə orqanları tərəfindən 22 804 cinayət qeydə alınıb və onların 90,5 faizinin açılması təmin edilib. Qanunsuz dövriyyədən isə 6 ton 443 kiloqram narkotik vasitə çıxarılıb.
Bu barədə oktyabrın 29-da Daxili İşlər Nazirliyində keçirilən Kollegiya iclasında məlumat verilib. İclas 2026-cı ilin 9 ayında əməliyyat-xidməti fəaliyyətin yekunlarına və qarşıda duran vəzifələrə həsr olunub.
Daxili işlər naziri, general-polkovnik Vilayət Eyvazov bildirib ki, cinayətkarlığa qarşı mübarizə, ictimai qaydanın və təhlükəsizliyin təmin olunması istiqamətində digər hüquq-mühafizə orqanları ilə birgə fəaliyyət davam etdirilib.
Cinayətlərin açılma göstəricisi 90,5 faiz olub
Hesabat dövründə əməliyyat-axtarış və istintaq fəaliyyətinin subyekti olan bütün dövlət qurumları üzrə qeydə alınmış 22 804 cinayətin 90,5 faizinin açılması təmin edilib.
Daxili İşlər Nazirliyi və prokurorluq üzrə qeydə alınan cinayətlərin açılma göstəricisi isə 93,7 faiz təşkil edib.
Nazirliyin məlumatına görə, ötən ilin müvafiq dövrü ilə müqayisədə ağır və xüsusilə ağır cinayətlər, qeyri-aşkar şəraitdə törədilən əməllər, adam öldürməyə cəhdlər, qəsdən sağlamlığa ağır və az ağır zərər vurma, oğurluq, dələduzluq, quldurluq və digər cinayətlərin sayı azalıb.
Həmçinin xuliqanlıq, yetkinlik yaşına çatmayanlar tərəfindən törədilən, odlu silahdan istifadə edilməklə və qrup halında baş verən hüquqazidd əməllərin sayında azalma qeydə alınıb.
Qeyri-aşkar şəraitdə törədilən, ağır və xüsusilə ağır cinayətlərin, eləcə də oğurluq və dələduzluq hallarının açılması üzrə nəticələrin yaxşılaşdığı bildirilib. Qəsdən adam öldürmə və cibgirlik cinayətlərinin açılması tam təmin olunub.
294 əvvəlki illərin cinayəti açılıb
DİN-in açıqladığı statistikaya əsasən, əvvəlki illərdən bağlı qalmış 294 cinayətin üstü açılıb. Axtarışa elan edilmiş şəxslərin 87,2 faizi tutulub.
Ağır və xüsusilə ağır cinayətlər törətmiş 402 nəfərdən ibarət 146 cinayətkar qrup zərərsizləşdirilib.
Xırda talama faktlarının 87 faizi açılıb, bu əməllər nəticəsində dəymiş maddi ziyanın 85 faizi ödətdirilib.
Narkotik dövriyyəsindən 6 ton 443 kiloqram vasitə çıxarılıb
Hesabat dövrünün diqqətçəkən göstəricilərindən biri narkotik vasitələrin qanunsuz dövriyyəsinə qarşı mübarizə ilə bağlıdır.
Yanvar-sentyabr aylarında qanunsuz dövriyyədən 6 ton 443 kiloqram narkotik vasitə çıxarılıb. Bu, ötən ilin eyni dövrü ilə müqayisədə 1 ton 780 kiloqram çoxdur.
Beləliklə, götürülən narkotik vasitələrin çəkisi əvvəlki ilin göstəricisini təxminən 38,2 faiz üstələyib.
Yol qəzalarında ölənlərin və xəsarət alanların sayı azalıb
DİN-in hesabatında yol hərəkəti təhlükəsizliyi ilə bağlı göstəricilər də yer alıb.
Ötən ilin müvafiq dövrü ilə müqayisədə yol-nəqliyyat hadisələrinin sayı 67 fakt, qəzalarda ölənlərin sayı 7 nəfər, xəsarət alanların sayı isə 117 nəfər azalıb.
Kollegiya iclasında nazirliyin aidiyyəti baş idarələrinin rəisləri görülən tədbirlər, əldə olunan nəticələr və aşkar edilmiş nöqsanların aradan qaldırılması istiqamətində görülən işlər barədə məruzə ediblər.
İclasa yekun vuran Vilayət Eyvazov hesabat dövründə qarşıya qoyulan tapşırıqların bütövlükdə yerinə yetirildiyini bildirib və fəaliyyətin effektivliyinin artırılması ilə bağlı növbəti vəzifələri müəyyənləşdirib.
