Yuxusuzluq
Qeyri-müntəzəm yuxu rejimi depressiya, narahatlıq və tənhalıq hissinin daha qabarıq şəkildə özünü göstərməsi ilə əlaqəlidir. Bu qənaətə ABŞ-ın San-Fransisko Kaliforniya Universiteti və San-Dieqo Kaliforniya Universitetinin tədqiqatçıları gəliblər.
Araşdırmanın nəticələri “Scientific Reports” elmi jurnalında dərc olunub.
Alimlər təxminən 23 min nəfərin məlumatlarını təhlil ediblər. İştirakçılar orta hesabla 154 gün ərzində yuxunu izləyən ağıllı üzüklərdən istifadə ediblər. Tədqiqatçılar onların nə qədər müntəzəm yatmağa getdiyini və oyandığını müəyyənləşdirib, bu göstəriciləri hər ay keçirilən psixoloji vəziyyət sorğuları ilə müqayisə ediblər.
Məlum olub ki, yuxu rejimi nə qədər qeyri-sabit olarsa, depressiya və narahatlıq əlamətləri də bir o qədər güclü olur. Depressiya əlamətləri olmayan iştirakçılarda yuxu müntəzəmliyi indeksi 100 mümkün baldan orta hesabla 84 olduğu halda, ağır depressiya əlamətləri olan şəxslərdə bu göstərici 75 bal təşkil edib.
Özünü daha çox tənha hiss edən iştirakçılarda da yuxu rejiminin qeyri-müntəzəm olduğu müşahidə edilib.
Tədqiqatçıların sözlərinə görə, hər gün eyni vaxtda yatmaq və oyanmaq orqanizmin daxili bioloji saatı hesab olunan sirkad ritmlərin qorunmasına kömək edir. Bu ritmlərin pozulması psixoloji sağlamlığa təsir etməklə yanaşı, qidalanma, fiziki aktivlik və gün işığında keçirilən vaxtın da adi rejimini dəyişə bilər.
Bununla belə, alimlər vurğulayırlar ki, bu əlaqə qarşılıqlı ola bilər. Yəni yuxu pozuntuları artıq mövcud olan psixoloji problemlərlə də müşayiət oluna bilər.
N. Talıblı
