Hollivudun əfsanəvi aktrisası Ceyn Fonda keçmiş həyat yoldaşı, media maqnatı və CNN telekanalının qurucusu Ted Törnerin milyardlarla dollarlıq mirasından pay almayıb.
Boşandıqdan sonra münasibətlərini isti saxlasalar da, aktrisa iş adamının həyatının son günlərinədək onu sevimli keçmiş həyat yoldaşı adlandırsa da, milyarderin son vəsiyyətnaməsində Fondanın adı yer almayıb.
Azpost.info -nun məlumatına görə, TMZ məhkəmə sənədlərinə istinadən xəbər verir ki, 87 yaşlı Törnerin yeganə varisləri onun beş övladıdır: Laura, Robert, Rett, Rid və Sara. Onlar eyni zamanda atalarının mirasının idarəçiləri təyin olunmaq üçün məhkəməyə müraciət ediblər.
Ted Törner 2026-cı il mayın 6-da vəfat edib. KİV-in qiymətləndirməsinə görə, onun sərvəti təxminən 2,5 milyard dollar olub. Beləliklə, açıqlanan sənədlərə əsasən, iş adamının bütün mirası övladlarına keçməlidir.
Vəsiyyətnamənin hazırlanma tarixçəsi də diqqət çəkib. Törner 2003-cü ildə, 64 yaşında olarkən sərvətinin etibarlı idarə olunması ilə bağlı ilk sənədləri rəsmiləşdirib. Sonrakı illərdə — 2005, 2006 və 2007-ci illərdə, daha sonra isə təxminən 20 il ərzində demək olar ki, hər il sənədlərə dəyişiklik edib. Vəsiyyətnamənin son variantı isə ölümündən cəmi bir il əvvəl, 2025-ci ildə hazırlanıb.
On il evlilik və boşandıqdan sonra davam edən sevgi
Ceyn Fonda Ted Törnerin üçüncü və sonuncu həyat yoldaşı olub. Onlar 1991-ci ildə ailə qurub, 2001-ci ildə isə on illik birgə həyatın ardından ayrılıblar. Boşanmalarına baxmayaraq, keçmiş ər-arvad yaxın münasibətlərini qoruyub saxlayıblar. Fonda iş adamını dəfələrlə “sevimli keçmiş həyat yoldaşım” adlandırıb.
Törnerin ölümündən sonra aktrisa onun həyatına necə böyük təsir göstərdiyini ifadə edən duyğusal paylaşım edib.
“O, həyatımda peyda oldu — möhtəşəm dərəcədə yaraşıqlı, inanılmaz romantik, qorxmaz bir pirat kimi. Həmin vaxtdan sonra mən artıq heç vaxt əvvəlki insan olmadım”, – deyə aktrisa yazıb.
Fonda etiraf edib ki, Törnerin yanında ilk dəfə kiməsə həqiqətən lazım olduğunu və qayğı gördüyünü hiss edib.
Sunay Aydın
