“Avropa kifayət qədər güclü deyil və ABŞ-ın köməyi olmadan Rusiya ilə Ukrayna arasındakı münaqişənin nəticələri fonunda problem yaşayacaqdı”.
Azpost.info xəbər verir ki, bunu Finlandiyanın Baş naziri Sanna Marin deyib.
“Son dərəcə dürüst olacağam – Avropa hazırda kifayət qədər güclü deyil. Birləşmiş Ştatlar olmasaydı, Avropa Ukrayna məsələsində çətin vəziyyətə düşərdi”, – Baş nazir bildirib.
Onun sözlərinə görə, Rusiyanın Ukraynada hərbi əməliyyatı başladıqdan sonra Kiyevə ən çox hərbi, humanitar və maliyyə yardımını Vaşinqton göstərib.
Marin əlavə edib ki, Avropa Ukraynaya dəstəyi artırmalı və müdafiə sənayesini gücləndirməlidir: “Biz Ukraynanın münaqişədə qalib gəlməsi üçün mümkün olan hər şeyi etməliyik. Sülh danışıqları gec-tez başlayacaq, lakin onlar Ukraynanın şərtləri ilə aparılmalıdır”.
Baş nazir hesab edir ki, ərzaq və enerji böhranları, eləcə də qlobal inflyasiyanın sürətlənməsi Rusiyanın hərəkətləri ilə bağlıdır.
Azpost.info
