ABŞ və İran arasında son aylarda dolayı danışıqlar aparılsa da, hələlik ciddi nəticə əldə olunmayıb.
Azpost.info bildirir ki, ABŞ Prezidenti Donald Tramp administrasiyası İranın nüvə proqramı və regional siyasəti ilə bağlı daha sərt mövqe nümayiş etdirir. İran isə sanksiyaların ləğv edilməsini əsas şərt kimi irəli sürür.
Ekspertlər hesab edir ki, hazırda tərəflər arasında etimad böhranı mövcuddur. İran rəhbərliyi ABŞ-ın danışıqlardan daha çox təzyiq vasitəsi kimi istifadə etdiyini düşünür. ABŞ isə Tehranı vaxt uzatmaqda ittiham edir.
Son günlər Pakistan vasitəçiliyi ilə yeni təmasların keçirildiyi bildirilsə də, prosesin gələcəyi qeyri-müəyyən olaraq qalır.
Politoloq Fərhad Məmmədov bildirir ki, ABŞ və İran arasında tammiqyaslı müharibə ehtimalı aşağı olsa da, lokal hərbi toqquşmalar və enerji infrastrukturu ətrafında gərginlik riski yüksəkdir.
Analitiklərə görə, danışıqların əsas nəticəsi enerji bazarına təsir olacaq. Əgər tərəflər kompromisə yaxınlaşsa, neft bazarında sakitləşmə mümkündür. Əks halda, yeni sanksiyalar və hərbi risklər qiymət artımını sürətləndirə bilər.
Qərb mediasında yayılan məlumatlara görə, Vaşinqton İranın nüvə proqramı ilə bağlı daha sərt nəzarət mexanizmi tələb edir. Tehran isə öz təhlükəsizlik maraqlarından geri çəkilmək istəmir.
Hazırda əsas proqnoz budur ki, tərəflər arasında qısa müddətdə böyük saziş əldə olunması çətin görünür. Lakin regionda genişmiqyaslı müharibənin qarşısını almaq üçün diplomatik kanalların açıq saxlanacağı ehtimal edilir.
Sunay Aydın
