AFFA İntizam Komitəsinin növbəti iclası keçirilib.
Azpost.info AFFA-nın rəsmi saytına istinadən xəbər verir ki, iclasda Premyer Liqanın IV turunda qeydə alınan qayda pozuntularına hüquqi qiymət verilib.
“Səbail”–“Kəpəz” oyunu bitdikdən sonra qonaq komandanın analitiki İlkin Verdiyev media nümayəndəsinin çəkiliş aparmasına mane olduğuna, ona fiziki təzyiq göstərməyə cəhd etdiyinə görə 2-si şərti olmaqla 5 oyun cəzalanıb, Gəncə təmsilçisi isə 4000 manat cərimə olunub. Sınaq müddəti 3 ay təyin edilib.
“Araz-Naxçıvan”–“Neftçi” meydan sahibləri 4, qonaqlar isə 6 futbolçusu sarı vərəqə aldığı üçün 700 manat cərimə ödəyəcək. Görüşün 90+5-ci dəqiqəsində Naxçıvan təmsilçisinin baş məşqçisi Elmar Baxşıyev rəqibi təhqir etdiyinə görə birbaşa qırmızı vərəqə aldığı üçün 3-ü şərti olmaqla 5 oyun cəza alıb, klubunu isə 4000 manat ziyana salıb. Sınaq müddəti 3 ay təyin edilib. Eləcə də “Araz-Naxçıvan”ın inzibatçısı Hüseynxəlil Orucoğlu analoji səbəbdən birbaşa qırmızı vərəqə aldıqdan sonra rəqib futbolçuya fiziki təzyiq göstərməyə cəhd etdiyinə görə 2-si şərti olmaqla 5 oyun cəzalanıb, klub isə 4000 manat cərimələnib.
Bundan başqa, “Neftçi” azarkeşləri tərəfindən rəqib futbolçuların ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə ilk dəfə yaşandığına görə paytaxt klubuna xəbərdarlıq edilib.
“Sabah”-“Sumqayıt” oyunu bitdikdən sonra meydançaya kənar şəxs daxil olduğuna görə Bakı klubu 800 manat cərimələnib. Həmçinin intizam qaydalarını pozan “Sumqayıt”ın baş məşqçisi Samir Abasova, o cümlədən qonaq komandanın azarkeşləri tərəfindən rəqibin ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə ilk dəfə yaşandığına görə kluba xəbərdarlıq olunub.
“Zirə”–“Şamaxı” oyunu bitdikdən sonra ev sahibi komanda AFFA nümayəndəsinin tələblərinə əməl etmədiyinə görə 2000 manat cərimə edilib.
