“Azərbaycan Dəmir Yolları” gücləndirilmiş iş rejiminə keçir

25 Dekabr 2019 - 10:38

“Azərbaycan Dəmir Yolları” QSC-nin kollektivi Dünya Azərbaycanlılarının Həmrəyliyi günü və Yeni il bayramı ilə əlaqədar gücləndirilmiş iş rejimində çalışacaq.

QSC-dən verilən məlumata görə, belə ki, bayram və istirahət günlərində sərnişinlərin Bakıdan Tbilisiyə və geriyə daşınması üçün dekabrın 27-də, 28-də, 29-da, 30-da və yanvarın 1-də, 2-də, 3-də və 4-də xəttə əlavə qatarlar qoşulacaq. Həmçinin Tbilisidən geriyə qayıdan sərnişinlər üçün 28, 29, 30, 31 dekabr və 1, 2, 3, 4, 5 yanvar tarixlərində Bakı-Tbilisi-Bakı beynəlxalq qatarının tərkibinə vaqonlar əlavə ediləcək.

Belə ki, dekabrın 27-də, 28-də, 29-da və yanvarın 1-də qatar 10-15 vaqonla yola düşəcək. Hər reysdə  400-600 sərnişinin daşınması nəzərdə tutulur. Dekabrın 30-da isə Bakı-Tbilisi qatarı maksimum sayda – 22 vaqonla təxminən 860 sərnişinlə hərəkət edəcək.

Geriyə Tbilisidən sərnişin axını əsasən 2, 3, 4 və 5 yanvar 2020-ci il tarixlərində gözlənilir.

Respublika daxilində sərnişin sıxlığının artdığını nəzərə alaraq, yerli istiqamətdə sərnişinlərin daşınmasını təmin etmək məqsədilə dekabrın 27-dən, 4 yanvar tarixi daxil olmaqla Bakı-Böyük Kəsik sürət və Bakı-Balakən-Bakı sərnişin qatarlarına əlavə plaskart tipli vaqonlar qoşulacaq.

Bakı-Gəncə-Bakı istiqamətində sərnişinlərin daşınmasına artan təlabatı təmin etmək məqsədilə, dekabrın 31-də Bakıdan həmin marşrut üzrə bir əlavə reys təyin ediləcək. Saat 8:00-da Bakıdan yola düşəcək qatar saat 11:45-də Gəncəyə çatacaq. Saat 16:00-da isə Gəncədən yola düşəcək və saat 19:45-də Bakıda olacaq.

“Bir daha sərnişinlərin nəzərinə çatdırırıq ki, yerli istiqamətdə hərəkət edən sərnişin qatarlarına biletlər 10 gün, beynəlxalq istiqamətə isə 30 gün əvvəldən satışa çıxarılır. Əlavə vaqonlara isə bilet satışı həmin vaqonlar qatara qoşulan gün həyata keçirilir”, – deyə QSC-dən bildirilib.