Azərbaycan xaricə siqaret ixracını sürətlə artırıb.
2025-ci ilin yanvar-noyabr aylarında Azərbaycan xarici ölkələrə 41 milyon 911 min dollar dəyərində 2 milyard 657,5 milyon ədəd siqaret ixrac edib.
FED.az-ın Dövlət Statistika Komitəsinin məlumatları əsasında apardığı hesablamalara əsasən, bu, 2024-cü ilin eyni dövrünün göstəricisindən məbləğ ifadəsində 40%, həcm baxımından 39% çoxdur.
Xatırladaq ki, 2024-cü ilin yanvar-noyabr aylarında Azərbaycan xaricə 29 milyon 856 min dollar dəyərində 1 milyard 910 milyon ədəd siqaret ixrac etmişdi.
2024-cü illə müqayisədə xaricə satılan siqaretin qiyməti demək olar dəyişməyib – qutusu 53,6 qəpik, 2024-cü ildə bu rəqəm 53,1 qəpik idi.
Azərbaycanın ən çox siqaret satdığı ölkə Gürcüstandır – xaricə satılan bütün siqaretlərin 82%-i qonşu ölkəyə göndərilir.
Belə ki, bu dövrdə Azərbaycan Gürcüstana 37 512,5 min dollarlıq 2 milyard 192 milyon ədəd siqaret ixrac edib. Bu ölkəyə satılan siqaretin orta qiyməti 58,2 qəpik olub.
İkinci yeri tutan Rusiyaya 2 milyon 550 min dollarlıq 252,4 milyon ədəd siqaret satılıb – qutusu 34,3 qəpik təşkil edib.
Ümumiyyətlə hesablama göstərir ki, Gürcüstanı çıxmaq şərtilə, digər ölkələrə, Azərbaycan siqareti qutusu 25-34 qəpik qiymətə satılır.
Belə ki, 2025-ci ilin yanvar-noyabr aylarında Azərbaycan Qırğızıstana 138 min dollarlıq 13,6 milyon ədəd siqaret (qutusu 34,5 qəpik);
Özbəkistana 214 min dollarlıq 27,6 milyon ədəd siqaret (qutusu 26,4 qəpik);
Tacikistana 337 min dollarlıq 33,2 milyon ədəd (qutusu 34,5 qəpikdən);
Birləşmiş Ərəb Əmirliklərinə 352 min dollarlıq 31,8 milyon ədəd (qutusu 37,6 qəpikdən);
Honkonqa 178,5 min dollarlıq 18,3 milyon ədəd (qutusu 33,2 qəpikdən);
Omana 412 min dollarlıq 54,9 milyon ədəd (qutusu 25,5 qəpikdən)
Suriyaya 216,5 min dollarlıq 28,7 milyon ədəd (qutusu 25,6 qəpikdən) siqerat satılıb.
