95 yaşlı Koreya müharibəsi veteranı və keçmiş Şimali Koreya kəşfiyyatçısı An Hak Sop doğma vətəninə — KXDR-ə qayıtmaq arzusundadır.
AzPost xəbər verir ki, o, 42 il Cənubi Koreya həbsxanasında cəza çəkdikdən sonra azadlığa çıxıb və son günlərdə keçirdiyi xəstəxana müalicəsindən sonra vətən torpağında ömrünün sonunu qarşılamaq istədiyini bəyan edib.
The Korea Times nəşrinin məlumatına görə, An Hak Sop 1953-cü ildə casusluqda ittiham olunaraq ömürlük həbs cəzası alıb. Koreya müharibəsində iştirak edən veteran uzun illər həbsxana şəraitində yaşasa da, ölkəsinə olan bağlılığını itirməyib. O, azadlığa çıxdıqdan sonra dəfələrlə KXDR-ə dönmək üçün müraciətlər etsə də, iki ölkə arasındakı diplomatik gərginlik bu arzunun reallaşmasına mane olub.
Rəsmi Seul Şimali Koreya ilə əlaqə qurmaqda çətinlik çəkir, çünki Pxenyan bütün repatriasiya cəhdlərini rədd edir. Buna baxmayaraq, 95 yaşlı veteran inadından dönmür. Avqust ayında o, sərhədi təkbaşına keçmək cəhdi göstərsə də, sərhədçilər tərəfindən saxlanılıb.
Seulda keçirilən mətbuat konfransında An Hak Sop yeni planını açıqlayıb. O, bu dəfə üçüncü ölkələr — Çin və Rusiya üzərindən KXDR-ə keçməyi düşünür. Yaşlı veteranın tərəfdarları bu riskli səfərin maliyyə dəstəyini üzərlərinə götürməyə hazır olduqlarını bildiriblər.
Lakin vəziyyəti daha da çətinləşdirən amil KXDR lideri Kim Çen Inın 22 sentyabrda verdiyi bəyanat olub. O, Cənubi Koreya ilə istənilən dialoqu qəti şəkildə istisna edib.
