Estoniya Baş naziri Kaya Kallasın əri Arvo Xallik alovlanan siyasi qalmaqal fonunda Rusiyaya yük daşımaları ilə məşğul olan logistika şirkətindəki payını satmaq planlarını açıqlayıb.
Azpost.info xəbər verir ki, Estoniya mətbuatı Xallikin yazılı bəyanatına istinadən məlumat yayıb.
“Başa düşürəm ki, mənim biznes fəaliyyətim, Estoniyadan Rusiyaya müştərimiz üçün daşıma edən “Stark Logistics” ilə işləməyim həyat yoldaşımın işinə təsir edəcək suallar doğurub. Mən digər səhmdarlarla razılaşdım ki, bütün səhmlərimi dərhal “Stark Logistics”ə satacağam. Həmçinin şirkətin idarə heyətindən istefa verəcək, maliyyə menecerinin əmək müqaviləsinə xitam verəcəyəm”, – Xallik bildirib.
İş adamı yaranmış vəziyyətə və həyat yoldaşına vurduğu ziyana görə üzr istəyib. O, Kaya Kallasın onun sahibkarlıq fəaliyyətindən xəbərinin olmadığını təsdiqləyib: “Biz bütün bunları medianın işıqlandırması fonunda müzakirə etdik və onun qiymətləndirməsi aydın oldu ki, heç bir hal bu daşımaların həyata keçirilməsinə haqq qazandırmır. Lakin daşınmanın dayandırılması mənim üçün artıq yetərli addım deyil. Bu şəraitdə “Stark Logistics”dəki payımdan və şirkətdəki işimdən tamamilə imtina etməyim daha yaxşıdır”.
Qeyd edək ki, Estoniyanın Baş naziri Kaya Kallas ərinin biznesi ilə bağlı məlumatların açıqlanmasından sonra istefa təhlükəsi ilə üzləşib. Məlum olub ki, ərinin ortaq sahibi olduğu nəqliyyat şirkəti Ukraynada müharibə başlayandan sonra Rusiyada fəaliyyətini davam etdirib.
Azpost.info
