Ford Motor Company şirkətinin baş direktoru Cim Farli bildirib ki, mövcud ticarət məhdudiyyətlərinə baxmayaraq, Çin avtomobil istehsalçıları yaxın 5–10 il ərzində ABŞ bazarına daxil olacaqlar.
Bu barədə Jalopnik nəşri məlumat yayıb.
Şirkət əməkdaşları ilə keçirilən görüşdə iştirak edən mənbələrin sözlərinə görə, Farli Çin avtomobil markalarının ABŞ bazarında peyda olmasını demək olar ki, qaçılmaz hesab edir. Onun fikrincə, bu prosesin daha çox həmin müddətin sonlarına yaxın baş verməsi ehtimal olunur.
Hazırda Çin elektromobil istehsalçıları ABŞ-yə qonşu ölkələrin, o cümlədən Meksikanın avtomobil bazarında mövqelərini gücləndirirlər. Ekspertlər isə Kanadanı ABŞ bazarına çıxışdan əvvəl mümkün “sınaq meydançası” kimi qiymətləndirirlər.
Hazırda ABŞ-də Çin istehsalı olan elektromobillərin satışı ciddi şəkildə məhdudlaşdırılıb. Belə ki, bu avtomobillərə əlavə 100 faizlik gömrük rüsumu tətbiq olunur. Bundan başqa, internetə qoşulan avtomobillərdə Çin istehsalı olan proqram təminatı və avadanlıqların istifadəsinə də qadağalar mövcuddur.
Artan rəqabət fonunda Ford Çin istehsalı modellərlə qiymət və səmərəlilik baxımından rəqabət apara biləcək daha münasib qiymətli elektromobil seriyası hazırlayır.
