Sosial şəbəkələrdə Milli Şuranın sədri Cəmil Həsənlinin qızı Günel Həsənlinin intim görüntüləri yayılıb. Şəxsi görüntülərin çəkilməsi və yayılması qanunla qadağan olunsa da, sözügedən görüntülər ötən gündən bəri bir çox teleqram qruplarında ayrı-ayrı şəxslər tərəfindən paylaşılaraq yayılır.
Hüquqşünas Ələsgər Məmmədli “Qafqazinfo”ya şəxsi həyatın toxunulmazlığını hüquqi baxımdan şərh edib və bildirib ki, həmin görüntülərin çəkilməsi və yayılması cinayət əməlidir: “İnsanların şəxsi həyatına müdaxilə olunması çox iyrənc haldır. Azərbaycan Konstitusiyasının 32-ci maddəsi açıq şəkildə şəxsi həyatı qoruyur və bununla bağlı dövlətin öhdəliklərini sadalayır. Ayrıca, Cinayət Məcəlləsinin 149-cu maddəsi şəxsi həyata qanunsuz müdaxilə, şəxsi həyata dair videoların çəkilməsi və yayılmasını cinayət əməli hesab edir. Buna görə 2 ilə qədər həbs cəzası müəyyən olunub. Vəzifə səlahiyyətlərindən sui-istifadə edən və ya başqa vasitələrdən istifadə edən varsa, ağırlaşdırıcı hal kimi müəyyən olunur. İstənilən şəxsin qarşısına belə video çıxsa və yaxud da kimsə bu tip müdaxilə etsə, onu heç bir halda yaymağa cəhd etməməlidir. Nəticə etibarilə, çəkənin məsuliyyəti ilə yayanın da məsuliyyəti eynidir. Bu baxımdan şəxsi həyata hörmət etmək lazımdır”.
Ə. Məmmədli əlavə edib ki, şəxsi həyat aspektindən hökumət dərhal bu tip məsələləri araşdırmalı, kimin etdiyini ortaya çıxarmalı və məsuliyyətə cəlb etməlidir.
“Qafqazinfo” məsələ ilə bağlı araşdırma aparılıb-aparılmadığını öyrənmək üçün DİN-lə əlaqə saxlayıb. Mətbuat xidmətindən bildirilib ki, bununla bağlı nazirliyə heç bir müraciət daxil olmayıb.
Xatırladaq ki, yayılmış görüntülərlə bağlı ötən gün Cəmil Həsənli şəxsi feysbuk hesabında paylaşım edərək bildirib ki, qızının 38 yaşı var və 10 ildən çoxdur ki, həyat yoldaşından ayrılıb. Onun öz şəxsi həyatı ola bilər və yenidən ailə də qura bilər: “Bunu ona heç kim, o cümlədən mən də qadağan edə bilmərəm. Burada qeyri-adi bir şey yoxdur”.
Milli Məclisin deputatı Bəhruz Məhərrəmov BBC radiosuna deyib ki, Azərbaycan hökumətini şəxsi həyatı ilə bağlı videonun yayılmasında günahlandırmaq absurddur. “Dünyanın müxtəlif ölkələrində istər şəxsi həyata müdaxilə, istərsə də bu məzmunda digər videolar yayılır. Bu, intiqam xarakterli ola bilir. Hətta öz yaxınları, qohumları tərəfindən belə halla üzləşənlərin nümunəsi var. Bu mənada ortada real sübut olmayıbsa, hökuməti bu məsələlərdə günahlandırmaq absurddur. Bununla bağlı hüquq-mühafizə orqanlarına müraciət etmək və daha sonra Azərbaycan hökumətini hərəkətsizlikdə ittiham edə bilərlər, lakin istənilən halda bu yalnız hüquq-mühafizə orqanları hərəkətsiz qaldıqda edilə bilər”.
Bəhruz Məhərrəmli deyir ki, “faktiki olaraq rəqib tanımayan şəxsin rəhbərlik etdiyi iqtidar bu kimi əməllərə niyə əl atsın?” O əlavə edir ki, Azərbaycan hökumətinin “belə yollara əl atmağa ehtiyacı yoxdur”.
Bitərəf deputat belə hallarla üzləşən şəxsləri hüquq-mühafizə orqanlarına müraciət etməyə çağırıb.
O, müstəqil hüquqşünasların “belə hallarla bağlı cinayət işləri açılmır, açılan işlərlə bağlı ictimaiyyətə məlumat verilmir” iddialarını absurd adlandırıb və əlavə edib ki, istənilən halda hüquqi yollara baş vurmaq lazımdır: “Bir daha deyirəm, istənilən halda hüquq var, qaydaları var, hətta Azərbaycanın daxil olduğu beynəlxalq mexanizmlər var. Azərbaycan məhkəmələrinin və hüquq-mühafizə orqanlarının qərarlarını ora qədər daşımaq imkanları var. Məncə, bu cür iddialardansa, məsələlərin hüquqi həllini axtarmaq daha doğru olar,”- bitərəf deputat bildirib.
