Enerji keçidi və iqlim maliyyələşdirilməsi COP31-in əsas prioritetləri sırasındadır.
Bunu COP31-in icraçı direktorunun müavini David Higgins BMT-nin İqlim Dəyişmələri üzrə Çərçivə Konvensiyasının Dördüncü İqlim Həftəsinin (CW4) açılış mərasimində deyib.
O, Azərbaycana təşəkkürünü bildirib, Azərbaycan və Türkiyə ilə əməkdaşlığın etimad, qarşılıqlı əməkdaşlıq və dostluq prinsipləri əsasında qurulduğunu vurğulayıb.
Qeyd olunub ki, bu tərəfdaşlıq COP31 üçün möhkəm zəmin yaradır.
Higgins COP31-in əsas məqsədlərindən birinin artıq qəbul edilmiş iqlim öhdəliklərinin icrasını təmin etmək və onların insanlar üçün konkret faydalara çevrilməsinə nail olmaq olduğunu vurğulayıb. Xüsusilə iqlim dəyişikliyinin təsirlərinə ən çox məruz qalan əhali və icmaların ehtiyaclarına diqqətin artırılacağı qeyd edilib.
Bu çərçivədə Türkiyə ilə sıx əməkdaşlıq şəraitində qlobal enerji keçidini dəstəkləyən prioritetlər üzrə beynəlxalq konsensusun formalaşdırılması istiqamətində iş aparıldığı diqqətə çatdırılıb.
Sakit okean ada dövlətlərinin iqlim dəyişmələrinin təsirləri ilə bağlı ən ciddi problemlərlə üzləşən regionlardan biri olduğu qeyd olunub. “Dəniz səviyyəsinin yüksəlməsi, ekstremal hava hadisələri, ərzaq və su təhlükəsizliyinə təhdidlər bu ölkələr üçün ciddi və həyati risklər yaradır. Bu baxımdan Sakit okean regionunun prioritetləri COP31 gündəliyində xüsusi yer tutacaq”, – o əlavə edib.
