Din və Qadın Hüquqları İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Erkən və qohumlar arasında nikahların qarşısının alınması”adlı layihənin icrasını davam etdirir.
4 ay müddətində Astara, Cəlilabad, Yardımlı, Biləsuvar, Masallı və Lənkəran rayonlarında həyata keçiriləcək layihənin məqsədi cənub bölgəsində erkən və qohumlar arasında bağlanan nikah problemlərinin qarşısının alınması istiqamətində maarifləndirici tədbirlərin təşkil edilməsi ilə problemin ictimailəşdirilməsidir.
Hər rayonda keçirilməsi nəzərdə tutulan tədbirdə 20 nəfər olmaqla, ümumilikdə 120 nəfərin iştirakı planlaşdırılır.
Layihə çərçivəsində problemin ictimailəşdirilməsi üçün 6 Dəyirmi Masa və maarifləndirici seminar-treninq keçiriləcək. Tədbirlərdə hədəf qrupu və onların yaxınları, yerli icra hakimiyyəti, bələdiyyələr, dini icmaların nümayəndələri, təhsil işçiləri, hüquq-mühafizə və digər müvafiq dövlət orqanları, QHT və KİV nümayəndələri iştirak edəcək.
Tədbir əsnasında Ailə Məcəlləsindən, “Məişət zorakılığının qarşısının alınması haqqında Qanun”dan, Nazirlər Kabinetinin 23 iyun 2020-ci il tarixli, 213 nömrəli Qərarından ümumi məlumat veriləcəkdir. Qanunun işləmə mexanizmləri barədə məlumat veriləcək, müxtəlif qurumların qanunun işləməsi üçün birgə fəaliyyəti və s. müzakirə ediləcək.
İştirakçılar erkən nikah problemi, onun mənfi nəticələri, fiziki və mənəvi zərərləri, onların aradan qaldırılması üçün qəbul edilən sənədlərdə cəza tədbirləri barədə maarifləndiriləcəklər. Erkən nikah problemini yaradan səbəblər müzakirə olunacaq və problemin həlli üçün müxtəlif təkliflər səsləndiriləcək. Erkən nikaha məcburetmə və erkən nikah prosesində iştiraka görə qanunla müəyyən olunmuş cəzalar barədə, qohumlar arasında nigahın fəsadları haqda məlumatlar veriləcək, fikir mübadiləsi aparılacaq. Problemin mövcud olması və aradan qaldırılması üçün məsuliyyət daşıyan qurumların problemin həlli üçün birgə fəaliyyəti müzakirə ediləcək. İştirakşıların rəy və təklifləri toplanacaq.
Layihə çərçivəsində növbəti tədbir avqustun 6-da Masallı rayonunda keçirilib. 28 nəfərin iştirak etdiyi tədbir Din və Qadın Hüquqları İB-nin sədri Tünzalə Qardaşovanın doğum günü münasibəti ilə təbriklə başladı.
Tünzalə xanım, D.Əliyeva adina Azərbaycan Qadınlarının hüquqlarının Müdafiə Cəmiyyəti” İctimai Birliyinin cənub regional şöbəsinin rəhbəridir. D.Əliyeva adına AQHMC İB-nin sədri Novella Cəfərova videobağlantı vasitəsilə qoşularaq Tünzalə xanımı ad günü münasibəti ilə təbrik etdi və tədbir iştirakçılarına müvəffəqiyyətlər arzuladı.
Tədbirdə gənclər-tələbələr, QHT könüllüləri və üzvləri, evdar qadınlar, həmçinin cəmiyyətin müxtəlif təbəqəsini təmsil edən insanlar iştirak edirdi. Bu səbəbdən müzakirələr daha canlı keçib.
İştirakçılar qohum nikahlar və erkən evliliklərlə bağlı qanunvericiliyə təklif edilən dəyişikliklər haqqında məlumatlandırılıblar.
Həmçinin, Ailə Məcəlləsində, Cinayət Məcəlləsində və İnzibati Xətalar Məcəlləsində dəyişiklik edilməsi haqqında qanun layihəsi ilə də tanış olublar.
Bununla yanaşı, qanun layihəsində aralarında nikahın bağlanması yol verilməyən subyektlər dairəsinin genişləndirilməsi ilə bağlı təkliflər də irəli sürülüb. Belə ki, bu problemdən əziyyət çəkən dünya əhalisinin bir qismi kimi, Azərbaycanda da qan qohumları arasında bağlanan nikahlar nəticəsində doğulan uşaqlarda genetik xəstəliklərin olması riski olduqca yüksəkdir.
Məhz bu problemin həlli məqsədilə Ailə Məcəlləsinin 12-ci maddəsində (Nikahın bağlanmasına mane olan hallar) yaxın qohumlarla yanaşı qardaşların və (və ya) bacıların ümumi bioloji baba və (və ya) nənəsi olan uşaqlar, o cümlədən bioloji qohumluğu olan əmi (dayı) və qardaş (bacı) qızı, həmçinin bibi (xala) və qardaş (bacı) oğlu arasında nikahın bağlanmasına yol verilməyən yeni normanın təsbit edilməsi nəzərdə tutulur.
Bütün bu məlumatlar iştirakçılar tərəfindən maraqla qarşılanıb və qızğın müzakirəyə səbəb olub.
Sonda iştirakçılar üçün çay və şirniyyat süfrəsi təşkil edilib və mövzu ilə bağlı söhbətlər aparılıb.
