Təhsilə və Uşaqlara Yardım İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Gənc ailələrə mənəvi dəstək” adlı layihənin icrasını davam etdirir.
3 ay müddətində Masallı rayonunda (Ərkivan qəsəbəsi, Seybətin, Şərəfə, Həsənli, Səmidxan kəndlərində) həyata keçiriləcək layihənin məqsədi gənclərə milli-mənəvi, əxlaqi dəyərləri mühafizə etməyi, milli ailə dəyərlərinini özündə ehtiva edən müasir ailə qurmağı və qorumağı təlqin etməkdir. Layihədən gözlənilən dəyişiklik- müasir ailə modelində milli ailəyə xas olan milli-mənəvi, əxlaqi dəyərlərin qorunub saxlanması və gələcək nəsillərə çatdırılması üçün bu günkü gəncliyin rol və vəzifələrini bir daha dərk etmələridir.
Layihə çərçivəsində növbəti tədbir avqustun 10-da Masallı rayonunun Həsənli kəndində keçirilib. 20 nəfərin iştirak etdiyi tədbiri Təhsilə və Uşaqlara Yardım İB-nin sədri Ələsgər Hüseynov açıb.
Tədbirin təlimçisi Nabat Qəniyeva iştirakçılara 2 vərəq paylayıb. Paylanan vərəqlərin birində “Milli-mənəvi və əxlaqi dəyərləri necə başa düşürsunuz?”, digərində isə “Ailə təməli hansı amillərə söykənərək qurulmalıdır?”suallarına cavab yazmaları xahiş olunub. Müzakirələr zamanı verilən cavablar oxunub, ümumiləşdirilib və təhlil edilib.
Tədbirdə müzakirələr aşağıdakı mövzular istiqamətində aparıldı;
-Milli-mənəvi, əxlaqi dəyərlər; tarixi köklərimiz
-Milli ailə və müasir ailələr haqda düşüncələr
-Ailədaxili münasibətlər (hörmət, güzəşt, qayğı, şiddət və s ) və nəticələr- gənclərin düşüncəsində və mütəxəsislərin gözü ilə.
-Boşanmalar və fəsadlar- gənclərin düşüncəsində və mütəxəsislərin gözü ilə.
-Böyüklərin tövsiyyəsi müasir gənclərə nə verir?
-Qarışıq ailələr və milli ailə dəyərləri.
-Qloballaşma və mədəni inteqrasiya şəraitində sosial şəbəkələr- zərurət yaxud milli-mənəvi, əxlaqi dəyərlərə zərbə (Gənclərin ailə həyatı qurmasında, boşanmada və tanışlıq-dostluq və s prosesində rolu)
Müzakirələr zamanı iştirakçıların bir qismi, ailələrin dağılmasında səbəb kimi daha çox ailədə dözümlülüyün olmamasını göstəriblər.
Digər qism, iqtisadi vəziyyətin çətin olmasını, iş yerlərinin olmaması səbəbindən kişinin evə az qazanc gətirməsi və bu səbəbdən hörmətdən düşməsi səbəbini göstəriblər.
Gənc oğlanlar indiki qızların tələblərinin daha çox olduğunu önə çəkiblər.
Bu və digər mövzularla bağlı müzakirələr keçib.
Sonda iştirakçıların tədbirin əvvəlində verilən suallara cavabları ümumiləşdirilərək oxunub.
İştirakçılar çay süfrəsi arxasında mövzu ilə bağlı söhbətlərini davam etdirib.
