Meyvə sağlam qidalanmanın əsas hissəsi hesab olunsa da, onu günün hansı vaxtında yeməyin daha faydalı olduğu barədə fərqli fikirlər var. Bəziləri meyvəni yalnız acqarına qəbul etməyi məsləhət görür, digərləri isə bunun elmi əsasının olmadığını bildirir.
Azpost.info bildirir ki, dietoloqların sözlərinə görə, sağlam insan üçün meyvənin səhər, günorta və ya axşam yeyilməsi arasında ciddi fərq yoxdur. Əsas məsələ gündəlik qəbul edilən meyvənin miqdarı və növüdür.
Yeməkdən əvvəl meyvə yemək nə verir?
Liflə zəngin olan alma, armud, şaftalı və digər meyvələr toxluq hissini artıra bilər. Bu səbəbdən arıqlamaq istəyən insanlar əsas yeməkdən 20-30 dəqiqə əvvəl meyvə qəbul etdikdə daha az qida yeyə bilirlər.
Yeməkdən sonra meyvə zərərlidirmi?
Qastroenteroloqlar bildirirlər ki, sağlam həzm sistemi olan insanlar üçün yeməkdən sonra meyvə yeməyin xüsusi zərəri yoxdur. Lakin mədə qıcqırması, reflüks və ya həzm problemləri olan şəxslərdə bəzi meyvələr narahatlıq yarada bilər.
Hansı meyvələrə üstünlük vermək lazımdır?
Mütəxəssislər mövsümi meyvələrin daha çox vitamin və antioksidant tərkibli olduğunu bildirirlər. Yay aylarında qarpız, yemiş, ərik, gavalı və şaftalı yaxşı seçim hesab olunur.
Dietoloqlar şəkərli desertləri meyvə ilə əvəz etməyin həm çəkiyə nəzarət, həm də ürək-damar sağlamlığı üçün faydalı olduğunu qeyd edirlər.
Sunay
