Prezident Vladimir Zelenski Ukrayna Silahlı Qüvvələrinin bölmələrinin hərəkəti haqqında məlumatın icazəsiz dərcinə görə cinayət məsuliyyəti müəyyən edən qanunu imzalayıb.
Azpost.info xəbər verir ki, bu barədə Ali Radanın mətbuat xidməti məlumat yayıb. Qanun layihəsini Ukrayna parlamentinin deputatları hazırlayıb. Sənəddə Cinayət Məcəlləsinə yeni maddə daxil edilir ki, buna əsasən, hərbçilərin mövqelərinin, hərəkətlərinin çəkilişinə və dərcinə görə 12 ilədək müddətə azadlıqdan məhrumetmə cəzası nəzərdə tutulur.
Bu tədbir hərbi vəziyyət dövründə qüvvədə olacaq. O cümlədən, ağırlaşdırıcı nəticələr vermədən silah, sursat və texnikanın hərəkəti haqqında məlumatların yayılmasına cavabdeh olanlar 3 ildən 5 ilədək müddətə cəzalandırılacaq. Ukrayna Silahlı Qüvvələrinin mövqeləri və ya onların yürüşdə hərəkəti haqqında məlumatın dərcinə görə isə 8 ilədək cəza nəzərdə tutulur. Əgər əməl bir qrup şəxs tərəfindən qabaqcadan əlbir olaraq “Ukraynaya silahlı təcavüz edən dövlətə belə məlumat vermək” məqsədi ilə törədilərsə, təqsirləndirilən şəxs 8 ildən 12 ilədək həbs cəzasına məhkum ediləcək.
Azpost.info
