Özbəkistanda yeni “Konstitusiya haqqında” qanun layihəsi ictimai müzakirəyə çıxarılıb.
Azpost.info xəbər verir ki, sənəd prezidentlik müddətinin 5 ildən 7 ilə uzadılmasını təklif edir.
Özbəkistan parlamentinin qanunvericilik palatası qanun layihəsini birinci oxunuşda qəbul edib.
Ümumilikdə konstitusiyanın 60-dan çox maddəsinə dəyişikliklərin edilməsi təklif edilir. Digər məsələlərlə yanaşı, hakimlərin (idarə başçılarının) eyni vaxtda xalq deputatları şuralarına rəhbərlik etməsinin qadağan edilməsi nəzərdə tutulur.
Dəyişikliklər parlamentin səlahiyyətlərini gücləndirmək, iqtisadi fəaliyyətin inhisarlaşmasının qarşısını almaq məqsədi də daşıyır.
Özbəkistanın 1992-ci ildə qəbul edilmiş hazırkı konstitusiyasına görə, prezident vətəndaşlar tərəfindən gizli səsvermə yolu ilə beş il müddətinə seçilir. Ölkənin əsas qanununa dəyişikliklərin təşəbbüskarı prezident Şavkat Mirziyoyevin özü olub. O, 2016-cı ildən bəri ardıcıl ikinci müddətdir vəzifədədir.
Mirziyoyev konstitusiyaya bütün ölkələrə qarşı sülhsevər xarici siyasət bəndinin daxil edilməsini təklif edib. Və bəyan edib ki, qanuna dəyişikliklər ümumxalq referendumunda razılaşdırılmalıdır.
Azpost.info
