“Moskva artıq Türkiyə, Ukrayna və BMT ilə “taxıl sazişi”nə qayıtmaq üçün Tolyatti-Odessa ammonyak boru kəmərinin yenidən açılmasını tələb etmir”.
Azpost.info xəbər verir ki, bunu Rusiya xarici işlər nazirinin müavini Mixail Qaluzin bildirib.
Onun sözlərinə görə, bütün digər tələblər qüvvədə qalır.
“Mövqemiz dəyişməz olaraq qalır, yəni ilk növbədə sistemli problemlərin həlli: “Rosselxozbank”ı SWIFT-ə yenidən qoşmaq, ehtiyat hissələrin tədarükünü bərpa etmək, nəqliyyat logistikasını və sığortanı qurmaq, Rusiya şirkətlərinin xarici aktivlərinə çıxışını bərpa etmək. Tolyatti-Odessa ammonyak boru kəmərinin açılması təəssüf ki, artıq müzakirə edilmir. Yalnız dediyim şərtlər yerinə yetirildikdən sonra Qara dəniz təşəbbüsünü canlandırmaq imkanları nəzərdən keçiriləcək”, – XİN rəsmisi deyib.
Moskva iyulun 17-də “taxıl sazişi”ndə iştirakın dayandırıldığını elan edib və Qara dənizdə naviqasiya təhlükəsizliyinə verilən təminatları geri götürüb. Bundan sonra Ukrayna limanlarına zərbələr endirməyə başlayıb. Rəsmi olaraq bu, sövdələşmənin Rusiya hissəsinin həyata keçirilməsində irəliləyişin olmaması səbəbindən edilib.
Azpost.info
