Rusiya və İran Yaxın Şərq, Cənubi Qafqaz və Xəzər regionunda sıx koordinasiyanın vacibliyini vurğulayıblar.
Azpost.info bildirir ki, Rusiya Xarici İşlər Nazirliyinin məlumatına görə, Rusiyanın xarici işlər naziri Sergey Lavrov Tehrana işgüzar səfəri çərçivəsində İran İslam Respublikasının prezidenti Məsud Pezeşkianla görüşüb, İranın xarici işlər naziri Abbas Əraqçi ilə geniş müzakirələr aparıb və İranın Ali Milli Təhlükəsizlik Şurasının katibi Möhsün Rzai ilə görüş keçirib.
Görüşlərdə ənənəvi olaraq konstruktiv atmosferdə ikitərəfli münasibətlərin aktual məsələləri ətraflı müzakirə olunub. Əsas diqqət sentyabrın 1-də Qırğızıstanın Bişkek şəhərində və oktyabrın 8-də Türkmənistanın Avaz şəhərində Rusiya və İran prezidentlərinin görüşlərində əldə olunmuş razılaşmalar fonunda hərtərəfli strateji tərəfdaşlığın möhkəmləndirilməsinə yönəlib.
Tərəflər siyasi dialoqun intensivliyini, hökumətlər və ayrı-ayrı sahələr səviyyəsində, parlamentlər, regionlar və biznes dairələri arasında sıx əməkdaşlığı məmnunluqla qeyd ediblər.
Ticarət-iqtisadi və investisiya əməkdaşlığının genişləndirilməsi, o cümlədən birgə nəqliyyat-logistika və enerji layihələrinin həyata keçirilməsi məsələlərinə də diqqət yetirilib.
Yaxın Şərqdə və Fars körfəzi zonasında, eləcə də Cənubi Qafqazda və Xəzər regionunda vəziyyətlə bağlı sıx koordinasiyanın zəruriliyi xüsusi vurğulanıb.
Sergey Lavrov Rusiyanın İran ətrafındakı vəziyyətin nizamlanmasına kömək göstərməyə hazır olduğunu təsdiqləyib. Bu kontekstdə o, tərəfdaşlarını bir gün əvvəl Bəhreynin Manama şəhərində Ərəbistan yarımadası ölkələrinin nümayəndələri ilə keçirdiyi təmaslar barədə məlumatlandırıb.
Tərəflər BMT, BRİKS, Şanxay Əməkdaşlıq Təşkilatı (ŞƏT) və Avrasiya İqtisadi İttifaqı (Aİİ) kimi çoxtərəfli platformalarda birgə səylərin fəallaşdırılmasında qarşılıqlı maraqlarını da qeyd ediblər.
Səfər Rusiya ilə İran arasında siyasi dialoqun davamı olub. Görüşlər ikitərəfli münasibətlərin və xarici siyasət sahəsində qarşılıqlı fəaliyyətin gələcək inkişafı üçün praktiki addımları müəyyənləşdirməyə imkan verib.