“Rusiyanın hərbi rəhbərləri Ukraynada taktiki nüvə silahından istifadənin mümkünlüyü, eləcə də vaxtını müzakirə ediblər”.
Azpost.info xəbər verir ki, “The New York Times” adını açıqlamadığı ABŞ rəsmilərinə istinadən yazıb.
Nəşrin yazdığına görə, ABŞ kəşfiyyatının əldə etdiyi məlumatlar oktyabrın ortalarında hökumətə təqdim edilib. Rusiya tərəfi hələlik bu məlumatı şərh etməyib.
“Rusiya prezidenti Vladimir Putin bu söhbətdə iştirak etməyib, lakin taktiki nüvə silahlarından istifadə mövzusunun müzakirəsi Ağ Evin rəhbəri Co Bayden administrasiyasında təşviş yaradıb”, – yazıda qeyd olunur.
ABŞ Milli Təhlükəsizlik Şurasının strateji kommunikasiyalar üzrə koordinatoru Con Kirbi məlumatı şərh etməkdən imtina edib. Bununla belə, Kirbi qeyd edib ki, ABŞ Rusiyanın taktiki nüvə silahı ilə zərbə endirməyə hazırlaşdığına dair hər hansı işarə görmür.
“Biz əvvəldən açıq şəkildə bildirdik ki, Rusiyanın nüvə silahının potensial istifadəsi ilə bağlı şərhləri dərin narahatlıq doğurur və biz onları ciddi qəbul edirik. Biz bacardığımız qədər buna nəzarət etməyə davam edirik və Rusiyanın belə istifadəyə hazırlaşdığına dair heç bir əlamət görmürük”, – Kirbi qeyd edib.
Azpost.info
