Rusiyanın Sankt-Peterburq şəhərində sakinlər sentyabrın 25-də mobil internetin işində ciddi problemlər yarandığından şikayət ediblər. Problem Rusiya Prezidenti Vladimir Putinin şəhərə səfəri gözlənilən gün baş verib.
Downdetector məlumatlarına görə, mobil internetlə bağlı şikayətlərin sayı saat 15:00-dan sonra artmağa başlayıb və təxminən 300-ə çatıb. İstifadəçilər sayt və tətbiqlərin açılmadığını, yalnız hakimiyyət tərəfindən icazə verilən “ağ siyahı”ya daxil edilmiş resursların işlədiyini bildiriblər.
Məlumata görə, cümə günü nə Sankt-Peterburqda, nə də Leninqrad vilayətində pilotsuz uçuş aparatlarının hücumu ilə bağlı xəbərdarlıq verilməyib.
Parklanma ödənişində də problem yaranıb
Sankt-Peterburq Şəhər Parklanmasının İdarəetmə Mərkəzi mobil internet vasitəsilə parklanma haqqının ödənilməsində problemlər yarandığını açıqlayıb.
Şəhərin mərkəzində bir sıra küçələr də nəqliyyat üçün bağlanıb. Nəticədə bəzi ərazilərdə ciddi tıxaclar yaranıb.
Məlumata görə, Universitet sahil küçəsinin Saray körpüsü ilə Kadetskaya xətti arasındakı hissəsi, Konnogvardeyski bulvarı və Qalernaya küçəsi nəqliyyatın hərəkəti üçün bağlanıb.
Obvodnı kanalının sahilində, Sadovaya küçəsində, Dekabristlər küçəsində və Malaya Morskaya küçəsində də tıxacların yarandığı bildirilir.
Putin Sankt-Peterburqa gedir
Bundan əvvəl Rusiya prezidentinin müşaviri Yelena Yampolskaya Vladimir Putinin sentyabrın 25-də Sankt-Peterburqa səfər edəcəyini və XII Beynəlxalq Birləşmiş Mədəniyyətlər Forumunda iştirak edəcəyini açıqlamışdı.
Forumun rəsmi proqramında isə Putinin çıxışı göstərilmir.
Yampolskayanın sözlərinə görə, tədbirdə iştirak etmək üçün 40 ölkə rəsmi nümayəndə heyəti göndərib.
Hazırda mobil internetdəki məhdudiyyətlərin Putin səfəri ilə birbaşa bağlı olduğu rəsmi şəkildə açıqlanmayıb. Lakin internetdəki problemlərin məhz prezidentin şəhərə səfəri günü və mərkəzdə hərəkətin məhdudlaşdırıldığı vaxtda baş verməsi diqqət çəkir.
