ABŞ prezidentinin xüsusi elçisi Stiv Uitkoff oktyabrın 21-i, çərşənbə günü Rusiyaya səfər edəcək. Bu barədə Norveçin baş naziri Yonas Qar Støre məlumat verib. Bloomberg-in yazdığına görə, onun sözlərinə əsasən, Rusiya rəhbərliyi ilə görüş Sankt-Peterburqda keçiriləcək.
“Uitkoff Rusiya rəhbərliyi ilə görüşəcək, görüşün nəticələrini və avropalı, eləcə də amerikalı həmkarlarının üzərində işlədiyi təklifləri müzakirə edəcək. Həmçinin, ola bilsin ki, liderlər səviyyəsində görüş üçün zəmin hazırlayacaq”, – deyə Norveçin baş naziri bildirib.
Støre Oslo şəhərində Uitkoffun və Ukrayna nümayəndələrinin iştirakı ilə keçirilən danışıqları da konstruktiv adlandırıb. Görüşdə Ukrayna prezidenti Volodimir Zelenski də iştirak edib.
Bundan əvvəl Finlandiya prezidenti Aleksandr Stubbun Osloda ABŞ nümayəndə heyəti ilə danışıqlardan əvvəl Volodimir Zelenskinin mətbuatla ünsiyyətini yarımçıq dayandırdığı məlum olub. Stubb təhlükəsizlik zərurətini əsas gətirərək ukraynalı həmkarını qonşu otağa aparıb və onu tək qoymayacaqlarına əmin edib.
Rusiya xarici işlər naziri Sergey Lavrov isə bundan əvvəl Vaşinqtonun təklifləri ilə bağlı heç bir illüziyaya qapılmadıqlarını bildirib. Onun sözlərinə görə, Rusiya bu təklifləri araşdıracaq, lakin siyasi güzəştlərə getməyəcək.