“Bu tarixi hadisə Cənubi Qafqaz regionunda və onun hüdudlarından kənarda davamlı sülh, sabitlik və rifahın bərqərar olması yolunda mühüm mərhələdir“.
AzPost bildirir ki, bu Türk Dövlətləri Təşkilatının Baş katibi Kubanıçbek Omurəliyevin Vaşinqtonda Azərbaycan prezidenti İlham Əliyev və Baş nazir Paşinyanın imzaladığı Birgə Bəyannamə ilə bağlı verdiyi bəyanatında bildirilir.
“Mən Azərbaycan Respublikasının Prezidenti və Ermənistan Respublikasının Baş nazirinin Birgə Bəyannaməni imzalamasını, habelə onların 2025-ci il avqustun 8-də ABŞ-ın Vaşinqton şəhərində keçirilmiş görüşündən sonra Amerika Birləşmiş Ştatlarının Prezidentinin şahid qismində sənədi imzalamasını alqışlayıram.
“Azərbaycan Respublikası ilə Ermənistan Respublikası arasında sülhün və dövlətlərarası münasibətlərin qurulması haqqında” Sazişin razılaşdırılmış mətninin paraflanmasını, eləcə də hər iki ölkənin xarici işlər nazirləri tərəfindən ATƏT-in Minsk Qrupunun və əlaqəli strukturların bağlanması ilə bağlı Avropada Təhlükəsizlik və Əməkdaşlıq Təşkilatına (ATƏT) birgə müraciətin imzalanmasının qətiyyətlə tərəfdarıyam.
Bu tarixi hadisə Cənubi Qafqaz regionunda və onun hüdudlarından kənarda davamlı sülh, sabitlik və rifahın bərqərar olması yolunda mühüm mərhələdir”.
