Ukraynada fond bazarının manipulyasiyası və çirkli pulların yuyulması ilə bağlı axtarışda olan Ali Radanın keçmiş deputatı Almaniyada saxlanılıb.
AzPost un məlumatına görə, bu barədə Ukrayna Dövlət İstintaq Bürosu (SBI)bildirib.
SBI-nin hesabatında onun adı qeyd olunmasa da, UNIAN və bir sıra digər Ukrayna media orqanları onun Petro Poroşenko Blokundan olan parlament üzvü Ruslan Demçak olduğunu bildiriblər.
Demçaka qarşı 2023-cü ildə Ukraynada iş açılıb. O, fond bazarının manipulyasiyası və fond birjasında insayder ticarətinə kömək etməkdə, eləcə də cinayət yolu ilə əldə edilmiş əmlakın yuyulmasında şübhəli bilinirdi.
“İstintaqa görə, deputat Ali Radanın Maliyyə Siyasəti və Bankçılıq Komitəsinin sədr müavini vəzifəsində çalışarkən iki özəl şirkətin direktorları ilə birlikdə fond birjasında dövlət istiqrazlarının manipulyasiyasında iştirak etmək üçün əlbir olub. Bu hərəkətlər nəticəsində təqsirləndirilən şəxs qanuni olaraq vergidən azad olan 20 milyon qrivna məbləğində qanunsuz investisiya mənfəəti əldə edib”, – deyə bəyanatda bildirilir.
Hüquq-mühafizə orqanları əməkdaşları həmçinin Demçakı əlbirləri ilə birlikdə cinayət yolu ilə əldə edilmiş vəsaitlərlə maliyyə əməliyyatları aparmaqda və onların qanunsuz mənşəyini xüsusilə böyük miqyasda gizlətməyə və maskalamağa yönəlmiş hərəkətlərdə ittiham edirlər. Onların məlumatlarına görə, bu, fond birjası fırıldaqçılığından 1 milyard qrivnadan çox pulun yuyulmasını əhatə edir. Təqsirləndirilən şəxslər bu vəsaitləri nəzarət etdikləri bank vasitəsilə alıblar.
Ukrayna Dövlət İstintaq Bürosu siyasətçinin vətəninə ekstradisiyasını tələb edəcəyini açıqlayıb. Sadələşdirilmiş prosedurla ekstradisiya təxminən üç ay çəkə bilər.
