Beynəlxalq bank
Xaricdə yaşayan azərbaycanlı Mamed Mustafayev “ABB” bankdan etdiyi köçürmə ilə bağlı ciddi narazılıq bildirib. AzPost xəbər verir ki, Mustafayev sosial şəbəkədə paylaşım edərək bankın beynəlxalq əməliyyat üzrə məsuliyyətsiz davrandığını və müştəri müraciətlərinə cavab vermədiyini qeyd edib.
Onun sözlərinə görə, bacısı 28 avqust 2025-ci il tarixində “ABB Mobile” tətbiqi vasitəsilə onun xarici hesabına 600 ABŞ dolları göndərib. Əməliyyat sistemdə “uğurla tamamlandı” kimi görünsə də, bu günə qədər vəsait nə qarşı tərəfə çatıb, nə də geri qayıdıb.
“Artıq 30 gündən çoxdur ABB-yə dəfələrlə müraciət edirəm, amma nə beynəlxalq izlənmə kodu (tracking code), nə də disput məktubu təqdim edirlər. Üstəlik, bank əməkdaşları bildirirlər ki, bu əməliyyat üzrə izlənmə kodu ümumiyyətlə mövcud deyil! Bəs o zaman ABB bu köçürmənin ‘uğurlu icra olunduğuna’ necə əmin olur?” – deyə Mustafayev bildirib.
O qeyd edib ki, bankdan yazılı cavab istədikdə “biz yalnız şifahi məlumat veririk” cavabı alıb:
“Bu, vətəndaş müraciətlərinə cavab verilməməsi, istehlakçı hüquqlarının pozulması və sadəcə müştəriyə hörmətsizlikdir. Əvvəllər belə hallarda pul ya qarşı tərəfə çatırdı, ya da geri dönürdü. Bu dəfə isə — sanki havaya sovrulub.”
Müştəri “ABB”dən ya əməliyyatın beynəlxalq izlənmə kodunun təqdim edilməsini, ya da vəsaitin geri qaytarılmasını tələb edir: “İllərlə etibar etdiyim bank indi sadəcə susur.”
Məsələ ilə bağlı ABB rəsmi səhifəsində Mustafayevin paylaşımına cavab verərək bildirib ki, yaranmış vəziyyətə görə təəssüf edirlər və araşdırma aparmaq üçün müştərinin məlumatlarını şəxsi qaydada təqdim etməsini xahiş ediblər.
