“Cari ilin 6 ayı ərzində 807 nəfər kvota yerləri üzrə olmaqla, ümumilikdə 74 min nəfər işlə təmin edilib“.
AzPost bildirir ki, bu barədə Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin (DMA) İdarə Heyətinin sədri Sadiq Əliyev AZƏRTAC-a müsahibəsində deyib.
Onun sözlərinə görə, o cümlədən 9 min 800 nəfər özünüməşğulluq proqramına, 761 nəfər əməkhaqqının birgə maliyyələşdirilməsi proqramına, 6 min 100 nəfər peşə hazırlığına, 139 min 600 nəfər peşəyönümü məsləhət xidmətlərinə cəlb olunub.
Özünüməşğulluq proqramı ilə bağlı ümumi statistikaya gəlincə isə, indiyədək bu proqram çərçivəsində 95 mindən artıq şəxs öz bilik və bacarıqlarına uyğun sahələr üzrə müvafiq aktivlərlə təmin edilib.
S.Əliyev deyib ki, agentlik tərəfindən qadınların məşğulluğunun təmin edilməsi daim diqqət mərkəzində saxlanılır. Cari ilin 6 ayı ərzində agentlik tərəfindən 24 min 400 qadın münasib işlə təmin edilib (onlardan 208-ü kvota üzrə, 328 nəfər isə əməkhaqqının birgə maliyyələşdirilməsi üzrə), 3 min 400 nəfər özünüməşğulluq proqramına, 3 min 900 nəfər isə peşə hazırlığı kurslarına cəlb olunub.
DMA tərəfindən gənclərin məşğulluğunun dəstəklənməsi və əmək bazarına inteqrasiyası məqsədilə bir sıra aktiv məşğulluq proqramları həyata keçirilib. Təkcə cari ilin 6 ayı ərzində agentlik tərəfindən ümumilikdə 28 min 283 nəfər gənc işlə təmin olunub. Bu kateqoriyadan olan 1643 nəfər özünüməşğulluq proqramına, 2 min 886 nəfəri isə peşə hazırlığına cəlb edilib. Sosial iş yerlərində işçilərin əməkhaqlarının maliyyələşdirilməsi proqramı üzrə 276, kvota yerləri üzrə isə 28 nəfər işlə təmin olunub.
