Hər bir foto ömrün bir anını saxlayır.
Azpost.info “FOTOXRONİKA” rubrikasında təqdim etdiyi şəkildə sovet Azərbaycanında fəaliyyət göstərmiş şəxslər əks olunub.
Fotoda 1980-ci ildə Azərbaycan SSR-də kitab sənayesinə həsr olunmuş tədbirdə çəkilib.
Şəkildə Azərbaycan Kommunist Partiyası Mərkəzi Komitəsinin birinci katibi olmuş mərhum Heydər Əliyev və Azərbaycan SSR Dövlət Nəşriyyat, Poliqrafiya və Kitab Ticarəti İşləri Komitəsinin sədri Marat Allahverdiyevdir. Sol tərəfdə isə “Gənclik” nəşriyyatının o zamankı direktoru, yazıçı Əzizə Əhmədova, “Azərnəşr” nəşriyyatının direktoru Əjdər Xanbabayev durub.
Mərhum Heydər Əliyev tərəfindən məsul vəzifəyə irəli çəkilərkən Marat Allahverdiyevin cəmi 34 yaşı olub.
O, müxtəlif vəzifələrdə çalşıb. Dəmir-beton zavodunun direktoru, Azərbaycan SSR Rabitə Nazirliyində Rabitə Montaj-Tikinti Trestinin rəhbəri olub. Daha sonra Mətbuat və İnformasiya Nazirliyinə çevrilən Dövlət Poliqrafiya və Kitab Ticarəti İşləri Komitəsinin sədri vəzifəsində çalışıb. M. Abdullayev eləcə də məşhur “Bərpaçı” mərkəzinin rəisi olub.
Marat Allahverdiyev sonrakı illərdə Azərbaycan mədəniyyət nazirinin müavini, Respublika Xalq Nəzarət Komitəsi sədrinin birinci müavini, Azərbaycan Respublikası Prezidenti yanında Ali Nəzarət İnspeksiyasının sədri kimi mühüm dövlət vəzifələrində çalışıb.
Texniki elmlər doktoru Marat Allahverdi oğlu Allahverdiyev 1990-1995-ci illərdə Azərbaycan SSR Ali Sovetinin deputatı olub.
O, 2015-ci ildə vəfat edib. Milli Məclisin sabiq deputatı Elnur Allahverdiyev Marat Abdullayevin oğludur.
Əjdər Xanbabayev Azərbaycan SSR Elmlər Akademiyasının “Elm” nəşriyyatının direktor, 1972–1978-ci illərdə “Azərnəşr”, 1978–1986-cı illərdə isə “Yazıçı” nəşriyyatının direktoru olub.
1986-cı ildə Azərbaycan SSR Mətbuat, Poliqrafiya və Kitab Ticarəti Dövlət Komitəsi sədrinin birinci müavini vəzifəsinə təyin edilib. 1989-cu ildə yenidən “Azərnəşr” nəşriyyatının direktoru olmuş və ömrünün sonunadək bu vəzifədə çalışıb. Əjdər Xanbabayevin nəşriyyat sahəsində fəaliyyəti dövründə 10 cildlik “Azərbaycan Sovet Ensiklopediyası”, 50 cildlik “Dünya uşaq ədəbiyyatı” seriyası, “Dünya ədəbiyyatı kitabxanası”nın ilk 30 nəşr edilib.
1990-cı ilin yanvarında 20 Yanvar faciəsi haqqında Azərbaycan və rus dillərində nəşr olunan “Qara yanvar” kitabının hazırlanmasına və çapına rəhbərlik edib.
Ə.Xanbabayevin taleyi faciəvi olub.
Əjdər Xanbabayev 1989–1990-cı illərdə Heydər Əliyevin Azərbaycana qayıtmasını dəstəkləyən və bu istiqamətdə fəaliyyət göstərən şəxslərdən biri olub. O, 30 may 1990-cı ildə Bakıda Azərbaycan Dövlət Akademik Rus Dram Teatrının binası yaxınlığında şəxsi avtomobilində güllələnərək öldürülüb. Qətllə bağlı 1995-ci ildə aparılan istintaq nəticəsində Tofiq Qasımov və Tarix Quliyev həbs edilib.Məhkəmənin hökmü ilə Tofiq Qasımov 9 il müddətinə azadlıqdan məhrum edilib, Tarix Quliyev isə ölüm cəzasına məhkum olunub. Sonradan Tarix Quliyevin cəzası ömürlük azadlıqdan məhrumetmə ilə əvəz edilib.
İstintaqın versiyasına görə qətl Əjdər Xanbabayevin Heydər Əliyevin Azərbaycana qayıtmasını dəstəkləməsi ilə əlaqədar təşkil edilib. 17 yanvar 1996-cı ildə Azərbaycan Prokurorluğu Azərbaycan SSR Dövlət Təhlükəsizlik Komitəsinin keçmiş sədri Vaqif Hüseynovu (və “Böhran” qrupunu) qətlin təşkilində ittiham edib.2001-ci ildə DTK-nın keçmiş əməkdaşı Sadıx Əliyev bu və digər cinayətlərə görə ömürlük azadlıqdan məhrum edilib.
Fotoda əks olunan Əzizə Əhmədova azərbaycanlı yazıçı, şair, tərcüməçi, dramaturq, ədəbiyyatşünas, ictimai xadim, filologiya elmləri doktorudur. O, 1967-ci ildə isə “Gənclik” nəşriyyatına direktor təyin edilib. Əzizə xanımın əsərləri keçmiş SSRİ və xarici ölkə xalqlarının dillərinə tərcümə edilib. Bir müəllif kimi onlarla kitabı dərc olunub. Əzizə Əhmədovanın əsərləri 30, 40, 50 min tirajla çap edilirdi. Bunlardan “Xınalı qayalar”, “Yaz qarı”, “Onu çiçəklər sevdi”, “Bu ellərə vurulmuşam”, “Bir ürək sındırmışam”, “Çiçəklərim” və digərlərinin adlarını sadalamaq olar.
Əzizə Əhmədova tərçüməçi kimidə böyük işlər görüb. V. Hauf, A. Kuprin, A. Qaydar, İ. Franko, S. Magilevskaya, C. Barri, M. Prilejayeva, A. Rıbakov, A. Lindqren və onlarla başqalarının əsərləri məhz azərbaycan dilinə tərcümə edibr.
1985-ci ildə Əzizə xanımın yeni kitabı olan “Damda yaşayan Karlsonla bacada yaşayan Damdabacanın macəraları” böyük əks-səda doğurdu.O, 2003-cü ildə Bakıda vəfat edib.
