Madriddə keçiriləcək sammitdə NATO liderləri Avropada əlavə qüvvələrin yerləşdirilməsini elan edəcək, həmçinin alyans üçün yeni strategiya qəbul edəcəklər.
Azpost.info xəbər verir ki, bu barədə ABŞ administrasiyasının yüksək rütbəli rəsmisi məlumat verib.
“Liderlər müdafiəni gücləndirmək və NATO-nun Avropada əlavə qüvvələr yerləşdirməklə bağlı yeni öhdəliklərini açıqlayacaqlar”, – amerikalı rəsmi deyib. Onun sözlərinə görə, NATO-nun yeni strategiyasında Rusiya alyans üçün ən ciddi və birbaşa təhlükə kimi göstəriləcək.
Bu barədə daha əvvəl NATO baş katibi Yens Stoltenberq də danışıb. O, bəyan edib ki, konsepsiyada Moskvaya qarşı hərbi mövqenin gücləndirilməsinə xüsusi diqqət yetiriləcək. Hazırkı NATO Strateji Konsepsiyası 2010-cu ildə təsdiq edilib. Orada Rusiya alyansın tərəfdaşı kimi göstərilir.
Stoltenberq bildirib ki, alyans Şərqi Avropa ölkələrinin hər birində öz qoşunlarının sayını artırmağı gözləyir. Belə ki, NATO həm də yeni müdafiə sxemləri hazırlayır. Bu planlarda NATO qüvvələri müttəfiqləri qorumaq və yüksək hazırlıq vəziyyətində olmaq üçün ayrılacaq.
Azpost.info
