ABŞ prezidenti Co Bayden və Almaniya kansleri Olaf Şolts Ağ Evdə Ukraynaya dəstək mövzusunda danışıqlar aparıblar.
Azpost.info xəbər verir ki, Bayden Almaniya kanslerini Oval kabinetdə qəbul edib.
“Mən əməkdaşlığımızı həqiqətən yüksək qiymətləndirirəm”, – Şolts Baydenə deyib.
ABŞ prezidenti də öz növbəsində Almaniya kanslerinə güclü və sabit rəhbərliyə görə təşəkkür edib: “Bunu səmimi deyirəm. Bu, böyük fərq yaratdı. Almaniya Ukraynaya qəti hərbi və mənəvi dəstək verdi. Hərbi yardımla yanaşı, ukraynalılara göstərdiyiniz mənəvi dəstək də böyük əhəmiyyət kəsb edir. 2022-ci il fevralın əvvəlində keçirilən görüşümüz zamanı Rusiya öz qoşunlarını Ukrayna ilə sərhəddə yığırdı. Qərb cavab verəcəyini vəd etdi və biz birlikdə bu vədi yerinə yetirdik”.
Şolts bildirib ki, Ukraynanı dəstəkləməyə davam edəcəklər: “Biz bunu davam etdirəcəyik. Nə qədər lazımdırsa, o qədər”.
Şolts Rusiyanın Ukraynaya qarşı müharibəsi başlayandan bəri ilk dəfə Vaşinqtona səfər edib. Bu, onun kansler vəzifəsinə keçdikdən sonra ABŞ-a ikinci səfəridir.
Ağ Evdə rəsmi foto çəkilişi üçün təxminən dörd dəqiqə vaxt ayrılıb. Bundan sonra ABŞ prezidenti və Almaniya kansleri təkbətək danışıqlara başlayıblar. DPA-nın məlumatına görə, müşavirlərin və protokol xidməti əməkdaşlarının görüşə qatılmasına icazə verilməyib.
Almaniya hökumətinin sözçüsü Şteffen Hebestrayın sözlərinə görə, Bayden və Şolts bir-biri ilə çox məxfi fikir mübadiləsi aparmaq istəyiblər: “Bu, onlar üçün çox vacib idi. Heç kimə sirr deyil ki, onlar bir-birlərini yüksək qiymətləndirirlər”.
Görüşdən sonra Ağ Ev mətbuata qısa açıqlama verib. Açıqlamada Baydenin Şoltsu ABŞ və Almaniya arasında güclü ikitərəfli münasibətləri təsdiqləmək üçün qəbul etdiyi qeyd olunur: “Liderlər təhlükəsizlik dəstəyinin təmin edilməsi üzrə davam edən səyləri, həmçinin Ukraynaya humanitar, iqtisadi və siyasi yardımı və Ukrayna xalqı ilə qlobal həmrəyliyin qorunmasının vacibliyini müzakirə ediblər. Onlar təsdiqləyiblər ki, Rusiya təcavüzə görə hesab ödəməyə davam edəcək. Co Bayden və Olaf Şolts digər qlobal problemlər haqqında da fikir mübadiləsi aparıblar”.
Ağ Ev bağlı qapılar arxasında aparılan danışıqlar nəticəsində hər hansı razılaşmanın əldə edilib-edilmədiyini açıqlamayıb.
Azpost.info
