Almaniya polisi və gömrük işçiləri Bavariyada rusiyalı milyarder Alişer Usmanovun daşınmaz əmlakına baxış keçiriblər.
Azpost.info xəbər verir ki, bu barədə “Reuters” məlumat yayıb.
Almaniya Gömrük İdarəsinin sanksiyalar üzrə yaratdığı “Matryoşka” xüsusi komissiyası Münhen və Rottax-Egern şəhərlərində istintaq hərəkətlərinin aparıldığını bildirib.
Hüquq-mühafizə orqanlarının əməkdaşları məhkəmənin qərarı əsasında axtarışlar aparıblar. Komissiya daha ətraflı məlumat verməkdən imtina edib.
“Bild”in məlumatına görə, axtarışlar Usmanovun villasında aparılıb. Nəticədə təxminən 140 min avro dəyərində olan “Mercedes Maybach S500” və 180 min avroya yaxın “Mercedes Brabus” markalı furqon, eləcə də digər maddi sərvətlər də daxil olmaqla 5 avtomobil ələ keçirilib.
Usmanovun nümayəndəsi bildirib ki, iş adamına qarşı şübhə üçün heç bir əsas ola bilməz. Çünki o, qanuni yolla əldə etdiyi şəxsi əmlakını həmişə düzgün bəyan edib və bu məqsədlər üçün xərclənən vəsaitin mənşəyini də açıqlayıb.
Almaniya hakimiyyəti Usmanovu sanksiyalardan yayınmaqda şübhəli bilir. Bundan başqa, Usmanova qarşı 555 milyon avro məbləğində vergidən yayınma və çirkli pulların yuyulması halları araşdırılır.
Azpost.info
