İsrail Baş naziri Benyamin Netanyahu İsrail ordusu komandanlığının ona təqdim etdiyi Qəzzada quru əməliyyatı planını imzalamaqdan imtina edib.
Azpost.info xəbər verir ki, bu barədə “The New York Times”a iki məlumatlı mənbə bildirib.
Onların sözlərinə görə, Netanyahu oktyabrın 7-də HƏMAS-ın hücumundan sonra ölkədə müxalifətlə birlikdə yaradılmış fövqəladə hökumət üzvləri tərəfindən planın yekdilliklə təsdiqini almaq istəyir.
Analitiklər bildiriblər ki, Netanyahu xüsusən də orduya Qəzzada təkbaşına əməliyyat keçirməyə icazə verməkdən ehtiyat edir, çünki o, ictimai etimadın azalmasından və uğursuzluq halında mümkün ittihamlarla üzləşəcəyindən qorxur.
Mənbələr eyni zamanda Netanyahunun qərarsızlığının İsrail ordusunun yüksək rütbəli zabitlərini qəzəbləndirdiyini bildiriblər. Onlar deyirlər ki, hərbçilərlə Baş nazir arasında qarşılıqlı şübhə o qədər güclənib ki, dövlət qulluqçuları hərbçilərə görüşlərə səsyazma aparatları gətirməyi qadağan ediblər.
Fikir ayrılıqları həm də əməliyyatın məqsədləri ilə bağlıdır. Netanyahu eyni vaxtda girovların azad edilməsinə nail olmaq və HƏMAS-ı məhv etmək istəyir, lakin bu vəzifələr arasında balans tapmaq olduqca çətindir. Bu fikir ayrılığı oktyabrın 26-da İsrailin müdafiə naziri Yoav Qallant çıxışında girovların xilas edilməsini ordunun hərbi məqsədlərindən biri kimi qeyd etmədikdə aydın oldu.
Azpost.info
