Rusiyanın Ukrayna müharibəsindən istifadə edərək ABŞ-ın hegemonluğunu zəiflətmək və amerikan təsirindən kənar qlobal qayda yaratmaq planları var.
Azpost.info bildirir ki, bunu “The Washington Post” qəzeti Rusiya XIN-nin məxfi sənədinə istinadən yazıb.
Məqalədə deyilir ki, söhbət “Rusiya Federasiyasının Xarici Siyasət Konsepsiyası” adlı sənədə məxfi əlavədən söhbət gedir.
Avropa kəşfiyyat xidmətlərindən biri tərəfindən qəzetə verilmiş həmin sənəddə deyilir ki, Moskva dost olmayan ölkələrə yanaşmasının dəyişdirilməsini davam etdirməli, Rusiyanın düşmənlərini zəiflətmək üçün onların zəif yerlərini aşkar etməlidir.
Qəzet yazır ki, burada söhbət əslində Moskvanın çoxdan bəri “hibrid müharibə” adlandırdığı konsepsiyanın rəsmi təsdiqindən gedir.
Məqalədə deyilir ki, Rusiya Qərbin Ukraynaya yardımlarını əngəlləməyə, ABŞ və Aİ ölkələrinin daxili siyasətini özünü təcrid və ekstremizmi təbliğ edən kampaniyalarla pozmağa çalışır. Bu da qeyd olunur ki, Rusiya hazırkı qüvvələr balansını dəyişmək məqsədilə Çin, İran və Şimali Koreya ilə daha sıx yaxınlaşmaq istəyir.
Rusiya ümid edir ki, Qərb özünün qarşıdurma siyasətinin və hegemonçuluq ambisiyalarının gələcəyi olmadığını anlayacaq.
Rusiya XİN qəzetin bu sənədlə bağlı sorğularını şərh etməkdən imtina edib.
Məqalədə deyilir ki, müxbir Rusiya diplomatlarına yaxın təhlilçilərdən biri ilə söhbət edib. Həmin politoloq deyib: “Rusiya ABŞ üçün dünyanın ən müxtəlif regionlarında çətinliklər yarada bilər. Yəni Yaxın Şərqdə, şimal-şərqi Afrikada və hətta Latın Amerikasında”.
Qəzet yazır ki, sözü gedən sənəd və ona məxfi əlavənin hazırlanmasından əvvəl Rusiya politoloqlarına təkliflər üçün müraciət edilmişdi. Məsələn politoloq Vladimir Jarixin təklif edib ki, Moskva Amerikada sağ təmayüllü təcridçi qüvvələrin hakimiyyətə gəlməsinə, Latın Amerikası ölkələrində qeyri-sabitliyə nail olmalı, Avropada isə ABŞ-ın siyasətlərindən narazı partiyalara dəstək verməlidir.
Kremlə verilən təkliflərdən birində deyilir ki, Moskva ABŞ və Çin arasında Tayvana görə münaqişəni qızışdırmalı və beləliklə də Pekinə daha sıx yaxınlaşmalıdır. Jarixin öz təkliflərinə şərh verməsinə dair The Washington Post qəzetinin xahişini rədd edib.
Amma politoloq qəzetə bundan əvvəl verdiyi müsahibədə demişdi: “Düşünürəm ki, ABŞ Rusiya ilə münaqişədə bütün dünyanın – Şimalın və Cənubun onu dəstəkləyəcəyindən əmin idi, amma bunun belə olmadığı üzə çıxdı. Bu onu nümayiş etdirir ki, təkqütblü dünya daha yoxdur. ABŞ bu həqiqətlə barışa bilmir”.
