İran prezidenti gələn həftə Moskvada Rusiya prezidenti ilə görüşəcək. Tərəflər ikitərəfli əməkdaşlığın inkişafını, birgə razılaşmaların icrasını və regional məsələləri müzakirə edəcəklər.
Bu barədə İranın xarici işlər naziri Abbas Əraqçi məlumat verib.
Nazirin sözlərinə görə, ötən həftə Rusiyanın xarici işlər naziri Sergey Lavrovla keçirilən görüşdə ikitərəfli münasibətlərdəki son hadisələr, eləcə də mühüm regional və beynəlxalq məsələlər ətrafında ətraflı fikir mübadiləsi aparılıb.
Əraqçi bildirib ki, müzakirələr zamanı siyasi və iqtisadi əməkdaşlığın inkişafı, birgə razılaşmaların həyata keçirilməsi və İranla Rusiya arasında hərtərəfli strateji tərəfdaşlığın gücləndirilməsi məsələləri diqqət mərkəzində olub.
Tərəflər ümumi maraqların qorunması, regionda sülh və sabitliyin möhkəmləndirilməsi üçün məsləhətləşmələrin davam etdirilməsinin vacibliyini də vurğulayıblar.
“Bu müzakirələr və məsləhətləşmələr gələn həftə Moskvada iki ölkənin prezidentlərinin iştirakı ilə davam etdiriləcək”, – deyə Abbas Əraqçi qeyd edib.
